தனுஷின் D50 படத்தில் வில்லனாக நடிக்க முடியாது என கூறிய இசையமைப்பாளர்.. என்ன காரணம்?
- IndiaGlitz, [Saturday,September 02 2023]
நடிகர் தனுஷ் தற்போது இயக்கி வரும் D50 என்ற திரைப்படத்தில் பிரபல இசையமைப்பாளர் ஒருவரை வில்லனாக நடிக்க அழைத்ததாகவும் ஆனால் அவர் நடிக்க மறுத்ததாகவும் செய்திகள் வெளியாகி உள்ளன
நடிகர் தனுஷ் தற்போது இயக்கி, நடித்து வரும் D50 என்ற படத்தின் படப்பிடிப்பு விறுவிறுப்பாக நடைபெற்று வருகிறது. சென்னையில் உள்ள தனியார் ஸ்டுடியோவில் போடப்பட்ட பிரமாண்ட செட்டில், 400க்கும் மேற்பட்ட துணை நடிகர்களுடன் இந்த படப்பிடிப்பு விறுவிறுப்பாக நடைபெற்று வருவதாகவும் அக்டோபர் வரை படப்பிடிப்பு தொடர்ந்து நடைபெறும் என்றும் கூறப்படுகிறது.
இந்த நிலையில் பிரபல இசையமைப்பாளர் தேவா அவர்களுக்கு தனுஷ் சமீபத்தில் போன் செய்து ’D50' படத்தில் நீங்கள் தான் வில்லனாக நடிக்க வேண்டும் என்று கூறியுள்ளார். அப்போது தேவா ’என்னை எப்படி நீங்கள் தேர்வு செய்தீர்கள்’ என கேட்டதற்கு ’வடசென்னை ஸ்லாங் உங்களுக்கு தான் சரியாக வரும், எனவே நீங்கள் இந்த படத்தில் நடித்த நன்றாக இருக்கும்’ என்று கூறினார்.
ஆனால் D50 படத்தில் நடிக்க தேவா மறுத்துவிட்டார். ’என்னால் வசனங்களை ஞாபகம் வைத்து பேச முடியாது, அதனால் அதிக டேக்குகள் எடுக்க வாய்ப்பு இருக்கிறது, இதனால் என்னால் படப்பிடிப்பு தாமதம் ஆகலாம்’ என்று தேவா கூறியதாக தெரிகிறது. இதனை அடுத்து தனுஷ், ‘பரவாயில்லை ஓகே சார்’ என்று கூறியதாக ஒரு பேட்டியில் இசையமைப்பாளர் தேவா கூறியுள்ளார்.