చిరంజీవి - కొరటాల చిత్రానికి మ్యూజిక్ డైరెక్టర్ ఫిక్స్
- IndiaGlitz, [Friday,September 27 2019]
చిరంజీవి ప్రతిష్టాత్మకంగా భావిస్తున్న చిత్రం ‘సైరా’ తర్వాత.. టాలీవుడ్‌ టాప్ డైరెక్టర్స్‌లో ఒకరైన కొరటాల శివ దర్శకత్వంలో సినిమా వస్తున్న సంగతి తెలిసిందే. ఇప్పటికే దీనిపై అధికారిక ప్రకటన వచ్చేసింది. అయితే.. చిరు సరసన హీరోయిన్‌గా ఎవరు నటిస్తున్నారు..? సంగీతం ఎవరు ఇస్తున్నారు..? విలన్ ఎవరు..? అనే విషయాలపై మాత్రం ఇంతవరకూ క్లారిటీ రాలేదు. అయితే ఈ మధ్య సంగీతం మాత్రం ‘సైరా’లో అదరగొట్టిన అమిత్ త్రివేదిని.. కొరటాల తీసుకుంటున్నట్లు వార్తలు వస్తున్న సంగతి తెలిసిందే.
దీంతో.. ‘శ్రీమంతుడు’, ‘జనతా గ్యారేజ్’, ‘భరత్ అనే నేను’ లాంటి హిట్ సినిమాలకు సంగీతాన్నిచ్చి సూపర్ డూపర్ హిట్ చేసిన రాక్‌స్టార్ దేవీ శ్రీ ప్రసాద్‌ను పక్కనెట్టేశారని.. పొరుగింటి పుల్లగూర రుచి అన్నట్లుగా బాలీవుడ్ నుంచి మ్యూజిక్ డైరెక్టర్స్‌ను తీసుకున్నారని వార్తలు పెద్ద ఎత్తున వచ్చాయి. ఈ క్రమంలో కొరటాల వ్యవహారంపై దేవీ శ్రీ అభిమానులు, సంగీత ప్రియులు కాసింత అసంతృప్తికి లోనయ్యారు.
ఓ వైపు వార్తలు.. మరోవైపు సోషల్ మీడియాలో కొరటాల ట్రోలింగ్స్ రావడంతో వెనక్కి తగ్గి మళ్లీ దేవీ శ్రీకే గ్రీన్ సిగ్నల్ ఇచ్చారట. మరికొందరేమో అబ్బే అసలు కొరటాలకు బాలీవుడ్ నుంచి తీసుకునే ఆలోచనే లేదు.. దేవీ శ్రీనే అనుకున్నారు.. ఆ వార్తలన్నీ పుకార్లేనని చెబుతున్నారు. అయితే తాజాగా.. దేవీ శ్రీకి ఫోన్ చేసిన కొరటాల.. సినిమా కోసం మంచి మ్యూజిక్ సిద్ధం చేసుకోవాలని చెప్పారని వార్తలు వినవస్తున్నాయి. మరి ఈ కన్ఫూజన్ ఏంటో..? ఇందులో నిజమెంతో..? తెలియాలంటే అధికారిక ప్రకటన వచ్చేంతవరకు వేచి చూడాల్సిందే మరి.