சுப்பர் ஸ்டார் ரஜினிகாந்த் குறித்து சமீபத்தில் திமுகவின் அதிகாரபூர்வ நாளேடான முரசொலியில் ஒரு கட்டுரை வெளிவந்தது. இந்த கட்டுரையில் ரஜினிகாந்த் ரசிகர்கள் ரஜினிகாந்த் மீது அதிருப்தியில் இருப்பது போன்று இருந்தது. நக்கலுடனும் கிண்டலாகவும் எழுதப்பட்டிருந்த இந்த கட்டுரையை வைத்து ஒருநாள் முழுவதும் செய்தி தொலைக்காட்சிகள் விவாதம் நடத்தி பரபரப்பை ஏற்படுத்தியது.

இந்த நிலையில் இன்றைய முரசொலியில் இந்த கட்டுரை குறித்து முரசொலி நிர்வாகம் ஒரு விளக்கம் அளித்துள்ளது, அதில் 'சூப்பர் ஸ்டார் ரஜினி குறித்து முரசொலியில் வெளிவந்த கட்டுரை சில நல்ல மனதை புண்படுத்துவதாக உள்ளதென்று கவனத்துக்கு கொண்டு வரப்பட்டது. இனி அத்தகையை செய்திகளை வெளியிடுவதில் கவனத்துடன் செயல்படுமாறு ஆசிரியர் குழுவுக்கு அறிவுறுத்தப்பட்டுள்ளது' என்று குறிப்பிடப்பட்டுள்ளது.

கருணாநிதியின் மறைவுக்கு பின் முரசொலியின் சர்க்குலேஷன் குறைந்ததாகவும், ரஜினியின் கட்டுரை வெளியான அன்று அதன் விற்பனை பலமடங்கு அதிகரித்ததாகவும் தொலைக்காட்சி விவாதத்தின்போது அரசியல் விமர்சகர் ஒருவர் கூறினார் என்பது குறிப்பிடத்தக்கது.