ఆ రీమేక్ కు ముహుర్తం కుదిరిందా?
- IndiaGlitz, [Thursday,March 15 2018]
అభిషేక్ వర్మన్ దర్శకత్వంలో అర్జున్ కపూర్, అలియా భట్ జంటగా నటించిన హిందీ చిత్రం 2 స్టేట్స్'. చేతన్ భగత్ రచించిన నవలాధారంగా 2014లో తెరకెక్కిన ఈ చిత్రం ఘన విజయం సాధించింది. ఇప్పుడు ఆ సినిమాను నూతన దర్శకుడు వెంకట్ రెడ్డి తెలుగులో రూపొందించనున్నారు. అడివి శేష్ హీరోగా నటించబోతున్న ఈ చిత్రంతో.. సీనియర్ నటుడు డా.రాజశేఖర్ పెద్ద కుమార్తె శివాని కథానాయికగా తెలుగుతెరకు పరిచయం కానుంది.
ఈ చిత్రాన్ని ఈ నెల 24న ప్రారంభించనున్నారు. ఇదిలా ఉంటే.. అడివి శేష్ తల్లి పాత్రలో నిన్నటి తరం బాలీవుడ్ నటి భాగ్యశ్రీ నటించనున్నట్టు సమాచారం. 1989లో వచ్చిన బాలీవుడ్ మూవీ మైనే ప్యార్ కియా' (ప్రేమపావురాలు)లో సుమన్‌ పాత్రలో ప్రేక్షకులను ఆకట్టుకున్నారు భాగ్యశ్రీ. అంతేకాదు.. 1997లో డా.రాజశేఖర్ నటించిన ఓంకారం' సినిమాలో కీలకపాత్ర పోషించారు. అలాగే.. 1998లో బాలకృష్ణ నటించిన యువ‌ర‌త్న రాణా' చిత్రంలో కూడా ఓ కీలకపాత్రలో నటించారీమే. ఇప్పుడు దాదాపు 20 సంవత్సరాల విరామం అనంతరం మళ్ళీ తెలుగులో నటిస్తున్నారు భాగ్యశ్రీ. లక్ష్య ప్రొడక్షన్స్ పతాకంపై ఎం.ఎల్.వి.సత్యనారాయణ నిర్మిస్తున్న ఈ చిత్రానికి అనూప్ రూబెన్స్ బాణీలు సమకూరుస్తున్నారు.