ஆஸ்திரேலிய கிரிக்கெட் அணி இந்தியாவில் சுற்றுப்பயணம் செய்து விளையாடி வருகிறது. இரு அணிகளுக்கும் இடையே சென்னையில் நடந்த முதல் ஒருநாள் போட்டியில் இந்தியா வெற்றி பெற்ற நிலையில் இன்று கொல்கத்தாவில் 2வது போட்டி நடைபெறவுள்ளது.

இந்த நிலையில் கொல்கத்தாவில் மழை பெய்ததால் நேற்று இந்திய அணி வீரர்களின் பயிற்சி ரத்து செய்யப்பட்டது. இதனையடுத்து தல தோனி, கொல்கத்தா ஈடன் கார்டன் மைதானத்தின் அருகே இருந்த காவல்துறையின் துப்பாக்கிச் சுடுதல் பயிற்சி மையத்துக்கு சென்றார். அங்கு அவருக்கு காவல்துறையினர் துப்பாக்கி சுடும் பயிற்சி அளித்தனர்.

ஒரு சிறிய பயிற்சிக்கு பின் தோனியின் குறிபார்த்து சுடும் திறனை பார்த்து கொல்கத்தா போலீசார் வியப்படைந்தனர். இதுகுறித்த புகைப்படம் ஒன்றையும் கொல்கத்தா போலீஸார், சமூக வலைதளங்களில் பதிவு செய்தனர். பின்னர் இந்த புகைப்படத்திற்கு கிடைத்த அமோக வரவேற்பு காரணமாக சில நிமிடங்களில் தோனி துப்பாக்கி சுடும் வீடியோவையும் வெளியிட்டனர். இந்த வீடியோவும், புகைப்படமும் தற்போது சமூக வலைத்தளத்தில் வைரலாகி வருகிறது என்பது குறிப்பிடத்தக்கது.