கடந்த வெள்ளியன்று வெளியான 'மிஸ்டர் சந்திரமெளலி' திரைப்படம் திரையரங்குகளில் ஓடிவரும் நிலையில் இந்த படத்தின் இயக்குனர் திரு, தளபதி விஜய் படத்தை இயக்கும் தனது ஆசையை பேட்டி ஒன்றில் வெளிப்படுத்தியுள்ளார்.

ஏற்கனவே விஜய் நடித்த 'பத்ரி' படத்தில் உதவி இயக்குனராக பணிபுரிந்துள்ள இயக்குனர் திரு, விஜய்யிடம் தனக்கு நல்ல அறிமுகம் இருப்பதாக கூறியுள்ளார். 'பத்ரி' படத்திற்கு பின்னர் இருவரும் வெவ்வேறு படங்களில் பிசியாகிவிட்டாலும், விஜய்க்காக ஒரு ஸ்கிரிப்ட் வைத்திருப்பதாகவும், சந்தர்ப்பம் வரும்போது விஜய்யை சந்தித்து கதை சொல்ல காத்திருப்பதாகவும் தெரிவித்துள்ளார். விஜய்யின் அடுத்த படத்தை இயக்க பல முன்னணி இயக்குனர்கள் காத்திருக்கும் நிலையில் அந்த பட்டியலில் தற்போது திருவும் இடம்பெற்றுள்ளார் என்பது குறிப்பிடத்தக்கது.

மேலும் விஜய் அவர்களுக்கு இயக்குனர் சொல்லும் ஸ்கிரிப்ட் பிடித்துவிட்டால் அதன்பின்னர் படத்தில் எந்தவிதத்திலும் தலையிட மாட்டார் என்றும் இயக்குனர் கூறுவதை அப்படியே ஏற்றுக்கொண்டு நடிக்கும் ஒரு வியக்கத்தக்க ஒரு நடிகர் என்றும் திரு புகழாரம் சூட்டியுள்ளார்.