മോൻസൻ മാവുങ്കൽ ഉൾപ്പെട്ട പുരാവസ്തു തട്ടിപ്പിൻ്റെ മുഖ്യ സൂത്രധാരൻ ഐ ജി ലക്ഷ്മൺ എന്ന് ക്രൈം ബ്രാഞ്ച്. അന്വേഷണത്തിൽ സുപ്രധാന തെളിവുകൾ കിട്ടിയെന്ന് ക്രൈം ബ്രാഞ്ച് വ്യക്തമാക്കി. എന്നാൽ ഐ ജി അന്വേഷണത്തിൽ നിന്ന് ഒളിച്ചോടാൻ ശ്രമിക്കുന്നു എന്നും ക്രൈം ബ്രാഞ്ച് കുറ്റപ്പെടുത്തി. അറസ്റ്റ് ഭയന്നാണ് ഐജി ലക്ഷ്മൺ ചോദ്യം ചെയ്യലിനു ഹാജരാകാതിരുന്നത്. പദവി ദുരുപയോഗം ചെയ്ത് മെഡിക്കൽ രേഖ ഉണ്ടാക്കി എന്നും സംശയമുണ്ട്.

ആയുർവേദ ചികിത്സയിൽ സംശയമുണ്ടെന്നും ക്രൈം ബ്രാഞ്ച് വ്യക്തമാക്കി. ഐജി യുടെ ആയുര്‍വേദ ചികിത്സയിലും മെഡിക്കല്‍ രേഖയിലും സംശയങ്ങളുണ്ട്. തിരുവനന്തപുരത്ത് മികച്ച ആയുര്‍വേദ ആശുപത്രി ഉണ്ടായിരിക്കെ, ഐജി ചികിത്സ തേടി വെള്ളായണിയിലെ ഡിസ്പെന്‍സറിയിലാണ് പോയത്. ഐപിഎസ് പദവി ദുരുപയോഗം ചെയ്ത് വ്യാജ മെഡിക്കല്‍ രേഖ ഉണ്ടാക്കിയെന്ന് സംശയിക്കുന്നുവെന്നും ക്രൈം ബ്രാഞ്ച് പറയുന്നു. പുരാവസ്തു തട്ടിപ്പിലെ ക്രൈം ബ്രാഞ്ച് കേസിൽ മൂന്നാം പ്രതിയാണ് ഐജി ലക്ഷ്മൺ.