பிரபாஸ் நடித்த ’ஆதிபுருஷ்’ என்ற திரைப்படம் தமிழ், தெலுங்கு, ஹிந்தி ஆகிய மொழிகளில் இன்று உலகம் முழுவதும் திரையரங்கில் வெளியாகியுள்ளது. இந்த படத்திற்கு மிகப்பெரிய எதிர்பார்ப்பு ஏற்பட்டிருந்தது என்பதும் இந்த படத்தின் கிராபிக்ஸ் காட்சிகள் அபாரமாக இருப்பதாகவும் கூறப்பட்டது.

ஆனால் இந்த படத்தின் முதல் காட்சி முடிந்த பிறகு கலவையான விமர்சனங்களை வெளிவந்து கொண்டிருக்கின்றன. குறிப்பாக கிராபிக்ஸ் காட்சிகள் திருப்தி அடையும் வகையில் இல்லை என்று கூறப்படுகிறது.

மேலும் இந்த படம் வெளியாகும் திரையரங்குகளில் அனுமனுக்காக ஒரு இருக்கை ஒதுக்கப்பட வேண்டும் என்று படக்குழுவினர்கள் தரப்பிலிருந்து வேண்டுகோள் விடுக்கப்பட்ட நிலையில் பல திரையரங்குகளில் ஒரு இருக்கை அனுமனுக்காக ஒதுக்கப்பட்டுள்ளது என்பது குறிப்பிடத்தக்கது.

இந்த நிலையில் ’ஆதிபுருஷ்’ திரைப்படம் திரையிடப்பட்ட ஒரு திரையரங்கில் திடீரென குரங்கு வந்து படத்தை பார்த்ததாக வெளியான வீடியோ இணையதளங்களில் வைரல் ஆகி வருகிறது. இந்த வீடியோவை பதிவு செய்யும் ரசிகர்கள் ’ஆதிபுருஷ்’ படத்தை பார்க்க அனுமனே திரையரங்கிற்கு வந்துவிட்டார் என பரவசத்துடன் பதிவு செய்து வருகின்றனர்.