தளபதி விஜய் நேற்று தனது தமிழக வெற்றி கழகத்தின் கொடியை அறிமுகம் செய்து ஏற்றிய நிலையில் அதே நாளில் ரஜினிகாந்த் மாணவ மாணவிகளுக்கு அவர்களுடைய வங்கி கணக்கில் கல்வி உதவிக்காக தனது சொந்த பணத்தை அனுப்பி உள்ளதாக செய்திகள் வெளியாகி உள்ளன.

வேலூர் மாவட்டத்தைச் சேர்ந்த ரஜினிகாந்த் ரசிகர் நற்பணி மன்றம் சார்பாக பரிந்துரை செய்யப்பட்ட மாணவர்களின் கல்வி கட்டணத்தை ரஜினிகாந்த் வழங்கி உள்ளதாக அறிவிக்கப்பட்டுள்ளது. இது குறித்து ரஜினிகாந்த் ரசிகர் நற்பணி மன்றத்தின் சார்பில் வெளியிடப்பட்டுள்ள அறிக்கையில் கூறியிருப்பதாவது:

நமது அன்புத்தலைவர் அவர்களின் ஆணைக்கிணங்க மத்திய தலைமை ரஜினிகாந்த் ரசிகர் நற்பணி மன்றம் வழிகாட்டுதல் படி ஒருங்கிணைந்த வேலூர் மாவட்டம் முழுவதிலும் தேர்ந்தெடுக்கப்பட்ட மாணவர்களுக்கான கல்வி கட்டணம் நேரடியாக அவர்களின் கல்லூரி வங்கி கணக்கில் வழங்கப்பட்டுள்ளது.

எங்களின் பரிந்துரையை ஏற்று அனைவருக்கும் கல்வி கட்டணம் வழங்கிய தலைவர் ரஜினிகாந்த் அவர்களுக்கு ஒருங்கிணைந்த வேலூர் மாவட்ட ரஜினிகாந்த் ரசிகர் நற்பணி மன்றம் சார்பாக மனமார்ந்த நன்றியை தெரிவித்துக் கொள்கிறோம்.

நேற்று விஜய் தனது அரசியல் கட்சியின் கொடியை ஏற்றியவுடன் விஜய் ரசிகர்கள் ரஜினிகாந்த் அரசியலுக்கு வராமல் ஒதுங்கிக் கொண்டது குறித்து மீம்ஸ்களை பதிவு செய்த நிலையில் அதே நாளில் ரஜினிகாந்த் மாணவர்களுக்கு தன்னுடைய சொந்த பணத்திலிருந்து கல்வி கட்டணத்தை செலுத்தி இருக்கும் தரமான சம்பவம் நடந்துள்ளது பரபரப்பை ஏற்படுத்தியுள்ளது.