நடிகர் மோகன் பல வருடங்களுக்கு பின்னர் மீண்டும் திரையுலகில் ரீஎன்ட்ரி ஆகியுள்ள நிலையில் அவர் நடித்த ‘ஹரா’ படத்தின் ரிலீஸ் தேதி அதிகாரப்பூர்வமாக அறிவிக்கப்பட்டுள்ளது.

தமிழ் சினிமாவின் சில்வர் ஜூப்ளி ஸ்டார் என்று அழைக்கப்பட்ட மைக் மோகன் கடந்த 80களில் ஏராளமான வெற்றி படங்களை கொடுத்தவர் என்பதும் ரஜினி, கமல் படங்களுக்கு இணையாக அவரது படங்கள் வசூலை வாரி குவித்தது என்பதும் தெரிந்தது.

ஆனால் கடந்த 1990 ஆம் ஆண்டுக்கு பிறகு அவருக்கு திடீரென வாய்ப்புகள் குறைந்தது என்பதும் 1991 ஆம் ஆண்டு ’உருவம்’ என்ற படத்தில் நடித்த மோகன், அதன் பிறகு 1999 ஆம் ஆண்டு ’அன்புள்ள காதலுக்கு’ 2008 ஆம் ஆண்டு ’சுட்ட பழம்’ ஆகிய படங்களில் நடித்த பிறகு அவர் திரையுலகில் இருந்து விலகிவிட்டார்.

இந்த நிலையில் நீண்ட இடைவேளைக்கு பிறகு அவர் ‘ஹரா’ என்ற திரைப்படத்தில் நாயகனாக நடித்துள்ள நிலையில் இந்த படத்தின் படப்பிடிப்பு முடிவடைந்து தற்போது ரிலீசுக்கு தயாராக உள்ளது. இந்த படம் வரும் ஜூன் 7ஆம் தேதி உலகம் முழுவதும் திரையரங்குகளில் வெளியாகும் என அதிகாரபூர்வமாக அறிவிக்கப்பட்டுள்ளது.

மோகன், யோகி பாபு, சாருஹாசன், மொட்ட ராஜேந்திரன், வனிதா விஜயகுமார் உள்பட பலர் நடிப்பில் உருவாகிய இந்த படத்தை விஜய்ஸ்ரீ இயக்கி உள்ளார். இந்த படத்தை எல்மா பிக்சர்ஸ் நிறுவனம் தமிழகத்தில் ரிலீஸ் செய்கிறது என்பது குறிப்பிடத்தக்கது.

நீண்ட இடைவெளிக்கு பிறகு வரும் மோகனின் ‘ஹரா’ படம் நல்ல எதிர்பார்ப்பை ஏற்படுத்தி உள்ள நிலையில் இந்த படம் நிச்சயம் ஹிட் ஆகும் என்று எதிர்பார்க்கப்படுகிறது.