కరోనా ఎఫెక్ట్ వ‌ల్ల లాక్‌డౌన్‌ను విధించాయి ప్ర‌భుత్వాలు. దీంతో సినీ సెల‌బ్రిటీలు ఇళ్ల‌కే ప‌రిమితం కావాల్సి వ‌చ్చింది. షూటింగ్స్ అన్నీ ర‌ద్ద‌యిపోవ‌డంతో ఎప్పుడూ షూటింగ్స్, ఇత‌ర కార్య‌క్ర‌మాల‌తో బిజీగా ఉండే స్టార్స్ అంద‌రూ ఖాళీగా కుటుంబ స‌భ్యుల‌తో స‌మ‌యాన్ని గ‌డుపుతున్నారు. ఇంటి ప‌నులు, వంట ప‌న‌లు చేస్తూ బిజీగా ఉండ‌ట‌మే కాకుండా కొత్త కొత్త ప‌నులు నేర్చుకుంటున్నారు. ఒక‌రికొక‌రు డిఫ‌రెంట్ ఛాలెంజ్‌లు విసుర‌కుంటున్నారు. తాజాగా న‌టుడు, నిర్మాత అయిన మోహ‌న్‌బాబు ఇప్పుడు ఓ ఛాలెంజ్‌లో పాల్గొన్నారు.

ఇటీవ‌ల సుబ్బ‌రామిరెడ్డి కుమార్తె విసిరిన ఛాలెంజ్‌లో పాల్గొని మ‌సాలా వ‌డ తయారు చేసిన మోహ‌న్‌బాబు ఇప్పుడు మ‌రోసారి పాక‌శాస్త్రంలో త‌న ప్రావీణ్య‌త‌ను నిరూపించుకున్నారు. కుమార్తె ల‌క్ష్మీ ప్ర‌స‌న్న‌తో క‌లిసి థాయ్‌, ఇండియ‌న్ ఫ్లేవ‌ర్‌లో ఓ వంట‌కాన్ని త‌యారు చేశారు. మోహ‌న్‌బాబుతో పాటు ఆయ‌న శ్రీమ‌తి నిర్మ‌ల కూడా ఈ రెసిపీని త‌యారు చేయ‌డంలో స‌పోర్ట్ చేశారు. దీనికి ఖీమా స్టిక్కీ ఫ్రైడ్ రైస్ అని పేరు పెట్టారు. ఈ వీడియోను ల‌క్ష్మీ మంచు త‌న ఇన్‌స్టాగ్రామ్‌లో పోస్ట్ చేశారు.