திமுக தலைவராக கடந்த ஐம்பது ஆண்டுகளுக்கும் மேல் இருந்த கருணாநிதி உடல்நலக்குறைவால் காலமானதை அடுத்து புதிய தலைவராக மு.க.ஸ்டாலின் போட்டியின்றி தேர்வு செய்யப்பட்டார். மு.க.ஸ்டாலினை தலைவராக தேர்ந்தெடுக்கும் தீர்மானத்தை திமுக பொதுச்செயலாளர் சற்றுமுன் வாசிக்க திமுக தொண்டர்களின் பலத்த கரகோசத்திற்கு இடையே திமுக தலைவராக மு.க.ஸ்டாலின் அறிவிக்கப்பட்டார்.

திமுகவின் இரண்டாவது தலைவராக மு.க.ஸ்டாலின் தேர்வு செய்யப்பட்டதை அறிந்தவுடன் அண்ணா அறிவாலயம் முன் கூடியிருந்த திமுக தொண்டர்கள் பட்டாசு வெடித்து தங்கள் மகிழ்ச்சியினை வெளிப்படுத்தினர். இதனால் தேனாம்பேட்டை பகுதியே ஒரே பட்டாசுமயமாக உள்ளது. திமுக தலைவராக தேர்ந்தெடுக்கப்பட்ட மு.க.ஸ்டாலினுக்கு க.அன்பழகன் உள்பட முன்னணி தலைவர்கள் வாழ்த்து கூறினர். அதேபோல் திமுக பொருளாளராக துரைமுருகன் அவர்கள் முறைப்படி அறிவிக்கப்பட்டார்.

முன்னதாக திமுக பொதுக்குழு கூட்டத்தில் பல்வேறு தீர்மானங்கள் நிறைவேற்றப்பட்டது. கருணாநிதி மறைந்த அதிர்ச்சியில் பலியான 248 திமுக தொண்டர்களின் குடும்பங்களுக்கு தலா ரூ.2 லட்சம் நிதியுதவி, வாஜ்பாய் மறைவிற்கு இரங்கல், கருணாநிதி உள்பட திமுகவினர் மறைவிற்கு இரங்கல், நீட் தேர்வால் தற்கொலை செய்து கொண்ட அரியலூர் மாணவி அனிதாவிற்கு இரங்கல் என பல தீர்மானங்கள் இயற்றப்பட்டது என்பது குறிப்பிடத்தக்கது