అఖిల్-4లో మిస్ ఇండియా ఫైనలిస్ట్?
- IndiaGlitz, [Monday,October 07 2019]
'అఖిల్'తో క‌థానాయ‌కుడిగా తొలి అడుగులు వేసిన అఖిల్ అక్కినేని.. ఆపై 'హ‌లో', 'మిస్ట‌ర్ మ‌జ్ను' చిత్రాల‌తో ప‌ల‌క‌రించాడు. ఈ మూడు సినిమాలు న‌టుడిగా అఖిల్‌కి మంచి గుర్తింపునే తీసుకువ‌చ్చినా.. సాలిడ్ హిట్‌నైతే ఇవ్వ‌లేక‌పోయాయి. ఈ నేప‌థ్యంలో.. నాలుగో చిత్రంపైనే త‌న ఆశ‌లు పెట్టుకున్నాడు ఈ అక్కినేని వారి మూడోత‌రం క‌థానాయ‌కుడు. 'బొమ్మ‌రిల్లు' భాస్క‌ర్ ద‌ర్శ‌క‌త్వంలో రూపొందుతున్న అఖిల్-4.. ఫ్యామిలీ ఎంట‌ర్‌టైన‌ర్‌గా తెర‌కెక్కుతోంది. ఇందులో అఖిల్‌కి జోడీగా క్రేజీ హీరోయిన్ పూజా హెగ్డే న‌టిస్తోంది. అంతేకాదు.. ఈ సినిమాలో మ‌రో హీరోయిన్‌కి కూడా స్థాన‌ముంద‌ట. ఆ పాత్ర‌లో మిస్ తెలంగాణ 2018, మిస్ ఇండియా ఫైనలిస్ట్ సాయి కామాక్షి భాస్క‌ర్ల న‌టిస్తోంద‌ని స‌మాచారం. త్వ‌ర‌లోనే కామాక్షి ఎంట్రీపై అధికారిక ప్ర‌క‌ట‌న వ‌చ్చే అవకాశ‌ముంది.
ఇదిలా ఉంటే.. ఇటీవ‌ల అఖిల్, పూజా హెగ్డే కాంబినేష‌న్‌లో కోర్టు నేప‌థ్యంలో సాగే స‌న్నివేశాల‌ను చిత్రీక‌రించారు. ఈ దృశ్యాలు సినిమాలో కీల‌క స‌మ‌యంలో వ‌స్తాయ‌ని స‌మాచారం. కాగా.. ప్ర‌స్తుతం నిర‌వ‌ధికంగా చిత్రీక‌ర‌ణ జ‌రుపుకుంటున్న ఈ క్రేజీ ప్రాజెక్ట్‌ని 2020 ప్ర‌థ‌మార్ధంలో విడుద‌ల చేయ‌డానికి స‌న్నాహాలు చేస్తున్నారు. గీతా ఆర్ట్స్ 2 పిక్చ‌ర్స్ ప‌తాకంపై బ‌న్నీ వాస్‌, వాసు వ‌ర్మ సంయుక్తంగా నిర్మిస్తున్న ఈ సినిమాకి గోపీసుంద‌ర్ బాణీలు అందిస్తున్నాడు.