தமிழக சுகாதாரத்துறை அமைச்சர் விஜயபாஸ்கரிடம் பெண் நிருபர் ஒருவர் கேட்ட கேள்விக்கு பதில் கூறாமல், 'நீங்க ரொம்ப அழகா இருக்கீங்க' என்று அமைச்சர் கூறியது பெரும் சர்ச்சையை ஏற்படுத்தியுள்ளது

காவிரி மேலாண்மை விவகாரம் குறித்து ஆலோசனை செய்ய நேற்று அதிமுக தலைமை அலுவலகத்தில் அக்கட்சியின் எம்எல்ஏக்கள் கூட்டம் நடைபெற்றது. இந்த கூட்டத்திற்கு பின்னர் வெளியே வந்த அமைச்சர் விஜயபாஸ்கரிடம் நிருபர்கள் கேள்விகளை கேட்டனர். அதற்கு அமைச்சர் சீனியர் தலைவர்கள் பிரஸ் மீட் வைப்பார்கள், அவர்களிடம் இதுகுறித்து கேள்வி கேளுங்கள் என்றார். ஆனால் ஒரு பெண் நிருபர் மட்டும் விடாது அமைச்சரை விரட்டி கேள்வி கேட்டு கொண்டே இருந்தார். அப்போது அமைச்சர் நீங்கள் ரொம்ப அழகா இருக்கீங்க, கண்ணாடி உங்களுக்கு ரொம்ப அழகா இருக்கு என்று கூறிவிட்டு சென்றுவிட்டார்.

அமைச்சரின் இந்த  சர்ச்சைக்குரிய பதிலுக்கு பத்திரிகையாளர்கள் கடும் கண்டனங்கள் விடுத்தனர். இதனையடுத்து சில நிமிடங்களுக்கு முன்னர் மீண்டும் அமைச்சர் விஜயபாஸ்கர் பத்திரிகையாளர்களை சந்தித்து தனது கருத்துக்கு வருத்தம் தெரிவித்தார். அரசியல் குறித்த கேள்விகளை தவிர்க்கவே தான் அவ்வாறு கூறியதாகவும், பத்திரிகையாளர்கள் அனைவரும் தனது சகோதர, சகோதரிகள் மாதிரி என்றும் கூறினார். இதனையடுத்து இந்த பிரச்சனை முடிவுக்கு வந்தது.