தளபதி விஜய் நடித்த ‘மாஸ்டர்’ திரைப்படம் சமீபத்தில் வெளியாகிய நிலையில் இந்த படம் தமிழகத்தில் மட்டும் 100 கோடி வசூல் செய்து விட்டதாகவும் உலகம் முழுவதும் 200 கோடி வசூலை நெருங்கி வருவதாகவும் சமூக வலைதளங்களில் தகவல்கள் வெளிவந்து கொண்டிருக்கின்றன.

இந்த நிலையில் ‘மாஸ்டர்’ பட வசூல் குறித்து செய்தியாளர் ஒருவர் கேட்ட கேள்வி ஒன்றுக்கு பதிலளித்த அமைச்சர் பாண்டியராஜன் தங்களது படம் வெற்றி பெற்றுவிட்டது என்று காட்டுவதற்காக 2 கோடி வசூல் செய்ததை 20 கோடி வசூல் ஆனதாக கணக்கு காட்டுவார்கள் என்று கூறியிருப்பது பெரும் பரபரப்பை ஏற்படுத்தி உள்ளது.

பொதுவாக திரையுலகில் வசூல் குறித்த விவரங்களை சமூக வலைதளங்களில் பலர் தங்கள் இஷ்டத்துக்கு தெரிவித்து வருவார்கள். உண்மையான வசூல் குறித்த தகவல்கள் தயாரிப்பாளருக்கு மட்டுமே தெரியும் என்ற நிலையில் பலர் தங்கள் கற்பனை குதிரைகளை அவிழ்த்துவிட்டு இஷ்டத்திற்கு ஒரு தொகையை சொல்வார்கள்.

சமூக வலைதள டிராக்கர்கள் என்று கூறிக் கொள்ளும் பலர் இந்த படத்தின் வசூலை தங்கள் இஷ்டத்துக்கு கூறி வரும் நிலையில் ‘மாஸ்டர்’ படத்தின் வசூல் குறித்து அமைச்சரின் கிண்டலான பதில் பரபரப்பை ஏற்படுத்தியுள்ளது.