వైఎస్ జగన్ ప్రభుత్వం ప్రతిష్టాత్మకంగా చేపట్టిన ‘జగనన్న సురక్ష’ కార్యక్రమం విజయవంతంగా సాగుతోందన్నారు నెల్లూరు జిల్లా వైసీపీ అధ్యక్షులు, వ్యవసాయశాఖ మంత్రి కాకాణి గోవర్ధణ్‌ రెడ్డి. గురువారం ఆయన మీడియాతో మాట్లాడుతూ.. ప్రజలకు అవసరమైన సేవలు అందించే ఇలాంటి కార్యక్రమాలతో వైసీపీ ప్రభుత్వం గొప్ప చరిత్ర సృష్టించిందన్నారు. అర్హత ఉన్న ఏ ఒక్కరూ సంక్షేమ పథకాలు అందకుండా ఉండరాదన్న లక్ష్యంతో జగనన్న సురక్షకు శ్రీకారం చుట్టామని గోవర్ధన్ రెడ్డి పేర్కొన్నారు. ఈ కార్యక్రమం జగనన్న ప్రభుత్వ నిబద్ధతకు ఉదాహరణగా నిలిచిందని తెలిపారు.

ఒక్క నెల్లూరు జిల్లాలోనే 552 జగనన్న సురక్ష క్యాంపులు పూర్తి :

జూలై 1 నుంచి ప్రారంభమైన జగనన్న సురక్ష 15,004 సచివాలయాలకు గాను ఇప్పటివరకు 10,700 సచివాలయాల పరిధిలో శిబిరాలు నిర్వహించిందని మంత్రి కాకాణి వెల్లడించారు. రాష్ట్ర వ్యాప్తంగా జగనన్న సురక్ష కోసం మొత్తం 1.17 కోట్ల కుటుంబాల్లో సర్వే చేశామని పేర్కొన్నారు. అందులో 57.3 లక్షల మందికి ధ్రువ పత్రాలు అందించి వారికి నేరుగా ప్రయోజనం చేకూర్చామని గోవర్ధన్ రెడ్డి చెప్పారు.
ఇప్పటి వరకు ఈ శిబిరాల ద్వారా 27,32,866 ఇంటిగ్రేటెడ్ సర్టిఫికెట్లు.. 24,46,599 ఆదాయ ధృవీకరణ పత్రాలు.. 3,159 ఓబీసీ సర్టిఫికెట్లు.. 5,199 ఫ్యామిలీ సర్టిఫికెట్లు జారీ అయ్యాయని మంత్రి తెలిపారు.

ఈ విజయం ప్రతీ వాలంటీర్‌ది: మంత్రి కాకాణి

అలాగే నెల్లూరు జిల్లాలో జగనన్న సురక్ష కార్యక్రమం వివరాలు కూడా మంత్రి కాకాణి గోవర్ధన్ రెడ్డి వెల్లడించారు. జిల్లాలో నేటికి మొత్తం 552 క్యాంపులను నిర్వహించినట్లు ఆయన చెప్పారు. జిల్లావ్యాప్తంగా మొత్తం 6,30,873 ఇళ్లలో సర్వే చేశారని గోవర్ధన్ రెడ్డి తెలిపారు. ఇందులో సేవల కోసం మొత్తం 3,92,199 అభ్యర్థనలు నమోదు కాగా.. వాటిలో 3,84,481 అభ్యర్థనలు ఆమోదించామన్నారు. అంతేకాకుండా ఈ నెల జూలై 18న ఒకే రోజులో 6,87,863 సర్టిఫికెట్లు జారీ చేసి రాష్ట్ర ప్రభుత్వం సరికొత్త రికార్డు సృష్టించిందని మంత్రి హర్షం వ్యక్తం చేశారు. గతంలో ఏ ప్రభుత్వమూ ప్రయత్నించని, సాధించని ఘనతను జగన్ ప్రభుత్వం సాధిచిందని పేర్కొన్నారు. ఈ భారీ విజయాన్ని సాధించిన ఘనత ప్రతి గ్రామ వాలంటీర్‌కు కూడా చెందుతుందని కాకాణి చెప్పారు. ప్రజల్లో అవగాహనను పెంపొందించేందుకు వాలంటీర్లు అవిశ్రాంతంగా పనిచేస్తున్నారని మంత్రి కాకాణి గోవర్ధన్ రెడ్డి ప్రశంసించారు.