விஜய் மீது வழக்கா? வழக்கறிஞருடன் அமைச்சர் சி.வி.சண்முகம் திடீர் சந்திப்பு
- IndiaGlitz, [Thursday,November 08 2018]
தளபதி விஜய் நடித்த 'சர்கார்' திரைப்படம் வெளியாகி இரண்டு நாட்கள் ஆகிவிட்ட நிலையில் இந்த படத்தில் இடம்பெற்றுள்ள ஒருசில காட்சிகள், வசனங்கள் குறித்து தமிழக அமைச்சர்கள் கடும் எதிர்ப்பை தெரிவித்து வருகின்றனர். குறிப்பாக அரசு இலவசமாக கொடுத்த பொருட்களை தீயில் போடுவது போன்ற காட்சிக்கு கடும் கண்டனங்கள் எழுந்து வருகின்றன.
இந்த நிலையில் சர்ச்சைக்குரிய காட்சிகளை நீக்காவிட்டால் சர்கார் படத்தின் தயாரிப்பாளர், விஜய், இயக்குனர் மற்றும் இந்த படத்தை திரையிட்ட திரையரங்குகள் மீது கடும் நடவடிக்கை எடுக்கப்படும் என சட்ட அமைச்சர் சி.வி.சண்முகம் நேற்று எச்சரிக்கை விடுத்திருந்தார்.
இந்த நிலையில் சற்றுமுன் அரசு தலைமை வழக்கறிஞரை தமிழக சட்ட அமைச்சர் சி.வி.சண்முகம் சந்தித்துள்ளதாகவும், 'சர்கார்' பட விவகாரம் பற்றி முக்கிய ஆலோசனை செய்து வருவதாகவும் தகவல்கள் வெளிவந்துள்ளது. ஏற்கனவே விஜய் முருகதாஸ் ஆகியோர்களை கைது செய்ய வேண்டும் என்று தனியரசு எம்.எல்.ஏ கூறியிருக்கும் நிலையில் சட்ட அமைச்சர் தலைமை வழக்கறிஞரை சந்தித்திருப்பது பெரும் பரபரப்பை ஏற்படுத்தியுள்ளது.