அடுத்த அதிமுக பொதுச்செயலாளர் யார்? பொன்னையன் தகவல்
- IndiaGlitz, [Saturday,December 10 2016]
மறைந்த செல்வி ஜெயலலிதா வகித்த வந்த அதிகாரம் மிக்க பதவியான அதிமுக பொதுச்செயலாளர் பதவிக்கு யார் தேர்வு செய்யப்படுவார் என அதிமுகவின் கோடானு கோடி தொண்டர்கள் காத்திருக்கும் நிலையில் விரைவில் முறைப்படி புதிய பொதுச்செயலாளர் தேர்வு செய்யப்படுவார் என்று அதிமுகவின் அமைப்பு செயலாளர் பொன்னையன் தெரிவித்துள்ளார்.
இதுகுறித்து அவர் இன்று செய்தியாளர்களிடம் கூறியபோது, 'மக்களால் நான் மக்களுக்காகவே நான், உங்களால் நான் உங்களுக்காக நான் என்று வாழ்ந்து மறைந்த ஜெயலலிதா கோடானகோடி மக்களின் இதயத்தில் தெய்வமாக வாழ்ந்து கொண்டிருக்கிறார்.
எம்ஜிஆர் தோற்றுவித்த அதிமுக-வை கட்டுக்கோப்பாக வளர்த்தவர் ஜெயலலிதா. அதிமுக ஆலமரம் போன்றது. ஒற்றுமை நிறைந்த ஜனநாயக இயக்கம் இது. இக்கட்சியின் பொதுச்செயலாளர் தேர்வு குறித்து பல்வேறு வதந்திகள் பரவி வருகிறது. பொதுச்செயலாளராக இவர் வருவார் அவர் வருவார் என்ற கூற்றுகள் அனைத்தும் வதந்தியே. அதிமுக-வின் பொதுச்செயலாளர் விரைவில் ஜனநாயக முறைப்படி தேர்ந்தெடுக்கப்படுவார்' என்று கூறினார்.