புதிய தொடரின் படப்பிடிப்பை தொடங்கிய திருமுருகன்.. 'மெட்டி ஒலி 2' உருவாகிறதா?
- IndiaGlitz, [Thursday,November 21 2024]
’மெட்டி ஒலி’ உள்பட பல பிரபலமான தொடர்களை இயக்கிய இயக்குனர் திருமுருகன் அடுத்த தொடருக்கான படப்பிடிப்பை தொடங்கி விட்டதாக கூறப்படும் நிலையில் இந்த தொடர் ’மெட்டி ஒலி’ தொடரின் இரண்டாம் பாகமா? என்ற கேள்வி தற்போது ரசிகர்கள் மத்தியில் எழுந்துள்ளது.
சன் டிவியில் ஒளிபரப்பான ’மெட்டி ஒலி’ தொடர் 2002 ஆம் ஆண்டு முதல் 2005 ஆம் ஆண்டு வரை மிகப்பெரிய வெற்றி பெற்றது என்பதும், இயக்குனர் திருமுருகன் இந்த தொடரில் கோபி என்ற கேரக்டரில் நடித்து இயக்கி இருந்தார் என்பது தெரிந்ததே.
இந்த தொடர் கிடைத்த வெற்றி காரணமாக அடுத்தடுத்து அவருக்கு தொலைக்காட்சி தொடர் இயக்க வாய்ப்பு கிடைத்தது என்பதும் ’நாதஸ்வரம்’ ’கல்யாண வீடு’ ’தேனிலவு’ ’குலதெய்வம்’ போன்ற தொடர்களை இயக்கிய அவர், ’எம் மகன்’ ’முனியாண்டி விலங்கியல் மூன்றாமாண்டு’ ஆகிய படங்களையும் இயக்கி உள்ளார்.
இந்த நிலையில் கடந்த சில மாதங்களுக்கு முன்னர் புதிய தொடரை இயக்க இருப்பதாக தனது யூடியூப் சேனல் மூலம் திருமுருகன் அறிவித்திருந்த நிலையில் தற்போது அந்த புதிய தொடரின் படப்பிடிப்பு தொடங்கி விட்டதாக தகவல் வெளியாகியுள்ளன. இருப்பினும் இது ’மெட்டி ஒலி’ தொடரின் இரண்டாம் பாகமா? அல்லது புதிய தொடரா? அல்லது அவர் தனது யூடியூபில் வெளியிட இருக்கும் தொடரா? என்பது குறித்த தகவல் இன்னும் வெளியாகவில்லை என்பது குறிப்பிடத்தக்கது.