తెలుగు రాష్ట్రాల్లోని కొన్ని ప్రాంతాల్లో గత మూడ్రోజులుగా భారీ వర్షాలు కురుస్తున్న సంగతి తెలిసిందే. ఈ వర్షం థాటికి ఇళ్లలో నుంచి బయటికి రావాలంటే జనాలు బెంబేలెత్తిపోతున్నారు. మరోవైపు వాహనదారులు తీవ్ర ఇక్కట్లు ఎదుర్కొంటున్నారు. ఇదిలా ఉంటే.. మెట్రో రైళ్ల రాకపోకలకు తీవ్ర అంతరాయం కలుగుతోంది. భాగ్యనగరంలో ఫ్లెక్సీ పడటం, సిగ్నలింగ్‌ లోపాలు ఇలా పలు సమస్యలతో రైళ్లు నిలిచిపోయాయి. దీంతో ప్రయాణికులు తీవ్ర ఇబ్బందులు పడుతున్నారు. భారీ వర్షంతో రహదారులు నీట మునగడంతో మెట్రోలో అయినా సేఫ్‌గా ఇంటికెళ్లొచ్చు అనుకున్న ప్రయాణికులకు ఇక్కట్లు తప్పలేదు. మరోవైపు మెట్రోలో ప్రయాణిస్తున్న ప్రయాణికులు ఎక్కడ ట్రైన్ ఆగిపోతుందో అని ఆందోళన.. ఇంకో వైపు తాము వేచి చూస్తున్న స్టేషన్‌కు ట్రైన్ ఎప్పుడెస్తుందా..? అని జనాలు వెయిటింగ్.. హైదరాబాద్‌లో పరిస్థితి ఇలా ఉంది.

శనివారం ఒక్క రోజే..!

ఒక్క శనివారం నాడే మియాపూర్-మూసాపేట, ఎల్బీనగర్-మూసాపేట, పెద్దమ్మ గుడి-మాదాపూర్, హైటెక్‌సిటీ-నాగోల్‌, కూకట్‌పల్లి, జూబ్లిహిల్స్ ప్రాంతాలతో పాటు పలుచోట్ల సాంకేతిక సమస్యలతో మెట్రో రూళ్లు ఆగిపోయాయి. ఫ్లెక్సీలు తెగిపడి హైటెన్షన్ వైర్లపై పడటం, సిగ్నలింగ్ సమస్యలు, మెట్రోలోని సున్నిత పరికరాలు దెబ్బతిని సేవల్లో అంతరాయం, ఇలా పలు కారణాల వల్ల మెట్రోలు ఎక్కడికక్కడ నిలిచిపోతున్నాయి.

చర్యలు చేపడతాం..!

ఈ సమస్యలపై హైదరాబాద్ మెట్రోరైలు ఎండీ ఎన్వీఎస్‌ రెడ్డి మీడియాతో మాట్లాడుతూ.. సమస్య నివారణకు చర్యలు చేపడతామన్నారు. రైళ్లలో పరికరాలు మార్చి ప్రయాణికులకు ఇబ్బందులు లేకుండా చేస్తామన్నారు. రైళ్లలో వాడే పరికరాలు కాలుష్యంతో మొరాయిస్తున్నాయని ఆయన చెప్పుకొచ్చారు. భారీగా వీస్తున్న ఈదురుగాలుల థాటికి ఫ్లెక్సీలు ట్రాక్‌పై పడుతున్నాయని.. తద్వారా మెట్రోలు నిలిచిపోతున్నాయన్నారు. ఈ సమస్యలన్నింటికీ పరిష్కార మార్గాలు చూస్తామని ఎన్వీఎస్ రెడ్డి స్పష్టం చేశారు.