போலாந்து நாட்டிற்கு சர்வதேச விளையாட்டு போட்டியில் கலந்து கொள்ள செல்லும் திருச்சியைச் சேர்ந்த மாற்றுத்திறனாளி மாணவர் ஒருவருக்கு தமிழ் நடிகர் ஒருவர் உதவி செய்துள்ள தகவல் தற்போது வெளிவந்துள்ளது.

திருச்சி துறையூர் சேர்ந்த நாகலாபுரத்தில் சேர்ந்த மாற்றுத் திறனாளி மாணவர் மணிகண்டன். இவர் போலந்து நாட்டில் வரும் 23ஆம் தேதி நடைபெற உள்ள சர்வதேச போட்டியில் 100 மீட்டர் ஓட்டம் மற்றும் நீளம் தாண்டுதல் போட்டிக்கு தகுதி பெற்றுள்ளார்.

இந்தநிலையில் தமிழ் நடிகர் மெட்ரோ சிரிஷ் அவர்கள் 10 ஆயிரம் ரூபாய் மதிப்புள்ள ஷூ ஒன்றை மணிகண்டனுக்கு அனுப்பியுள்ளார். மேலும் அவர் மணிகண்டன் சர்வதேச போட்டியில் வெற்றி பெறுவதற்காக தனது வாழ்த்துக்களையும் தெரிவித்துள்ளார். இதுகுறித்து மணிகண்டனுக்கு மெட்ரோ சிரிஷ் எழுதியுள்ள வாழ்த்து கடிதத்தில் கூறியிருப்பதாவது:

வெள்ளத் தனைய மலர்நீட்டம் மாந்தர்தம்
உள்ளத்தனையது உயர்வு

உன் வாழ்வின் உயரம் என்பது உன் மன உறுதியின் பொறுத்தே அமைந்தது. இது வள்ளுவரின் வாக்கு. எவ்வளவு துன்பங்கள் தடைகள் வந்தாலும் மன உறுதியை மட்டும் விட்டுவிடாதே. போலந்தில் நடைபெறும் சர்வதேச தடகள போட்டியில் வெற்றிபெற என்னுடைய வாழ்த்துக்கள் என்று கூறியுள்ளார்.

இந்நிலையில் இது குறித்து மணிகண்டனின் தாயார் கூறும்போது ’எனது மகனுக்காக உதவி செய்த மெட்ரோ சிரிஷ் அவர்களை எனது இன்னொரு மகனாகவே நான் நினைக்கிறேன். அவருக்கு எனது நன்றி’ என்று கூறியுள்ளார்.