'மெட்ரோ' வில்லனாகும் 'மெட்ரோ' நாயகன்
- IndiaGlitz, [Wednesday,June 29 2016]
கடந்த வெள்ளியன்று வெளியான 'மெட்ரோ' திரைப்படம் ஊடகங்கள் மற்றும் விமர்சகர்களின் பாசிட்டிவ் விமர்சனங்கள் காரணமாக தமிழகம் முழுவதும் திரையரங்குகளில் வெற்றிகரமாக ஓடிக்கொண்டிருக்கின்றது. ஷ்ரிஷ் சரவணன் நாயகனாக நடித்த இந்த படத்தில் பாபிசிம்ஹா நெகட்டிவ் கேரக்டரில் அசத்தலாக நடித்திருந்தார். ஆனந்த கிருஷ்ணா இந்த படத்தை இயக்கியிருந்தார்.
இந்நிலையில் இந்த படத்தை சென்னையில் சமீபத்தில் பார்த்த பிரபல தெலுங்கு தயாரிப்பாளர் ஒருவர் தெலுங்கில் இந்த படத்தை ரீமேக் செய்ய விருப்பம் தெரிவித்ததாக கூறப்படுகிறது.
மேலும் இந்த படத்தில் ஷிரிஷ் சரவணன் நடித்த கேரக்டரில் நாகசைதன்யா நடிக்கவுள்ளதாகவும், இந்த படத்தின் வில்லன் கேரக்டரில் ஷிரிஷ் சரவணன் நடிக்கவுள்ளதாகவும் கூறப்படுகிறது. தமிழ் 'மெட்ரோ' படத்தில் நாயகனாக நடித்தவர் தெலுங்கு 'மெட்ரோ'வில் வில்லனாக நடிக்கவுள்ளார் என்பது குறிப்பிடத்தக்கது.