മെസ്സി വീണ്ടും ഇരട്ടഗോൾ നേടി; മയാമിക്ക് ഉജ്ജ്വല വിജയം
- IndiaGlitz, [Thursday,August 03 2023] Sports News
ലീഗ്സ് കപ്പ് മത്സരത്തിൽ ഇന്റര്‍ മയാമിക്കായി ലയണൽ മെസ്സി വീണ്ടും ഇരട്ട ഗോൾ അടിച്ചു. മത്സരത്തിൽ ഇന്റർ മിയാമി ഒന്നിനെതിരേ മൂന്ന് ഗോളുകൾക്ക് ഒർലാൻഡോ സിറ്റിയെ പരാജയപ്പെടുത്തി. ഇതോടെ യുഎസിൽ കളിച്ച മൂന്ന് മത്സരങ്ങളിൽ നിന്ന് മെസ്സി നേടിയ ഗോളുകളുടെ എണ്ണം അഞ്ചായി. തുടർച്ചയായി തോൽവികൾ വഴങ്ങിയ ഇന്റര്‍ മയാമി, മെസ്സിയുടെ വരവോടെ മൂന്ന് കളികളും ജയിച്ചു കയറി.
മത്സരത്തിൻ്റെ ഏഴാം മിനുട്ടിൽ ആയിരുന്നു മെസ്സിയുടെ ആദ്യ ഗോൾ. റോബേർട് തോമസ് ടെയ്ലറിന്റെ പാസ് നെഞ്ചിൽ ഏറ്റുവാങ്ങി ഇടം കാലൻ വോളിയിലൂടെ മെസ്സി വലയിലേക്ക് എത്തിക്കുക ആയിരുന്നു. 72-ാം മിനിറ്റിലായിരുന്നു മെസ്സിയുടെ രണ്ടാം ഗോൾ. റോബർട്ട് ടെയ്‌ലറുടെ അസിസ്റ്റിലൂടെ മാർട്ടിനെസാണ് മെസ്സിക്ക് പന്ത് കൈമാറിയത്. 51–ാം മിനിറ്റില്‍ ലഭിച്ച പെനൽറ്റിയിലൂടെ ജോസഫ് മാർട്ടിനെസും ഇന്റർ മയാമിക്കായി ഗോൾ നേടി. ഓഗസ്റ്റ് 6 ഞായറാഴ്ചയാണ് ലീഗ്സ് കപ്പിലെ മയാമിയുടെ പ്രീക്വാർട്ടർ മത്സരം. എഫ്സി ഡല്ലാസാണ് പ്രീക്വാർട്ടറിലെ എതിരാളികൾ.