మెగా కుటుంబంలో హీరోలు ఎవ‌రైనా స‌రే, టైటిల్‌, టీజ‌ర్ వంటివ‌న్నిటినీ మెగాస్టార్‌, ప‌వ‌ర్‌స్టార్‌కు చూపించ‌కుండా దాదాపు విడుద‌ల చేయ‌రు. అది వాళ్లు చిరంజీవికి, ప‌వ‌న్‌కల్యాణ్‌కు ఇచ్చే మ‌ర్యాద‌. తాజాగా వైష్ణ‌వ్‌ తేజ్ కూడా మేన‌మామ‌ల స‌ల‌హా కోసం వెయిట్ చేస్తున్నార‌ట‌. వైష్ణ‌వ్‌ తేజ్ హీరోగా మైత్రీ మూవీ మేకర్స్, సుకుమార్ రైటింగ్స్ క‌లిసి ఓ సినిమాను రూపొందిస్తున్న సంగ‌తి తెలిసిందే. సుకుమార్ అసిస్టెంట్ బుచ్చిబాబు ఈ సినిమాకు ద‌ర్శ‌క‌త్వం వ‌హిస్తున్నారు.

ఈ సినిమా ఫ‌స్ట్ లుక్‌ను చూసిన వాళ్లంద‌రూ వైష్ణ‌వ్ తేజ్ ఈ చిత్రంలో చేప‌లు ప‌ట్టే వృత్తి చేస్తాడా? అనే అనుమానాలు వ్య‌క్తం చేశారు. అలాంటి అనుమానాల‌కు ఊత‌మిచ్చే విధంగా సినిమాకు `జాల‌రి` అనే టైటిల్ ప్ర‌చారంలోకి వ‌చ్చింది. మ‌రోవైపు మైత్రీ మూవీ మేక‌ర్స్ `ఉప్పెన‌` అనే మ‌రో టైటిల్‌ను కూడా రిజిస్ట‌ర్ చేయించింది. ఏదైనా వైష్ణ‌వ్ తేజ్ తొలి సినిమాకు సముద్రంతో సంబంధం ఉంద‌న్న‌మాట‌. ఇంత‌కీ `జాల‌రి`, `ఉప్పెన‌`లో మెగా హీరోలు ఏ టైటిల్‌కు ఓటు వేస్తారో వేచి చూడాల్సిందే!