ప్ర‌స్తుతం త‌న 152వ చిత్రం ‘ఆచార్య‌’తో బిజీగా ఉన్నాడు మెగాస్టార్ చిరంజీవి. కొర‌టాల శివ ద‌ర్శ‌క‌త్వంలో తెర‌కెక్కుతోన్న ఈ సినిమా షూటింగ్‌ త్వ‌ర‌లోనే పునః ప్రారంభం కానుంది. ఈ సినిమా షూటింగ్ పూర్తి కాగానే చిరు పెద్ద‌గా గ్యాప్ తీసుకోకుండా త‌దుప‌రి సినిమాను స్టార్ట్ చేసేస్తార‌ట‌. ఇప్ప‌టికే చిరంజీవి రెండు సినిమాల‌ను స్టార్ట్ చేయాల్సి ఉంది. అందులో ముందుగా మ‌ల‌యాళ చిత్రం ‘లూసిఫ‌ర్‌’ను చిరు స్టార్ట్ చేస్తార‌ట‌. సినీ వ‌ర్గాల స‌మాచారం మేర‌కు వినాయ‌క్ ద‌ర్శ‌క‌త్వం వ‌హించ‌నున్న ఈ సినిమాకు ఆకుల శివ స్క్రీన్‌ప్లే, మాట‌ల‌ను రాశాడ‌ట‌. చిరంజీవి సైతం స్క్రిప్ట్‌కు ఓకే చెప్పేశాడ‌ట‌. దీంతో వినాయ‌క్ త‌దుప‌రి సినిమా ప‌క్కా అయిన‌ట్లేన‌ని అంటున్నారు.

వ‌చ్చే ఏడాది జ‌న‌వ‌రిలో ‘లూసిఫ‌ర్‌’రీమేక్‌ను స్టార్ట్ చేయాల‌ని మెగా క్యాంప్ అనుకుంటుంద‌ట‌. ఆలోపు కొర‌టాల శివ ‘ఆచార్య‌’ను పూర్తి చేసేస్తాడ‌ట‌. చిరు 153వ చిత్రంగా ‘లూసిఫ‌ర్‌’ రీమేక్ తెర‌కెక్క‌నుంద‌ట‌. కొణిదెల ప్రొడ‌క్ష‌న్ కంపెనీతో పాటు ఎన్.వి.ప్ర‌సాద్ ఈ చిత్రాన్ని నిర్మించ‌నున్నార‌ట‌. చిరంజీవితో ఠాగూర్‌, ఖైదీ నంబ‌ర్ 150 చిత్రాల‌ను తెర‌కెక్కించిన డైరెక్ట‌ర్ వినాయ‌క్ హ్యాట్రిక్ హిట్ కోసం ఆస‌క్తిగా ఎదురుచూస్తున్నాడ‌ట‌.