మెగాస్టార్ చిరంజీవి డ్రీమ్ ప్రాజెక్ట్ `సైరా న‌ర‌సింహారెడ్డి`. ఆయ‌న న‌టిస్తోన్న 151వ చిత్ర‌మిది. ప్ర‌స్తుతం పోస్ట్ ప్రొడ‌క్ష‌న్ కార్య‌క్ర‌మాలు శ‌ర‌వేగంగా జ‌రుగుతున్నాయి. చిత్రానికి సంబంధించిన బిజినెస్ వ్య‌వ‌హారాలు పూర్తి చేసే ప‌నిలో నిర్మాత రామ్‌చ‌ర‌ణ్ బిజీ బిజీగా ఉన్నాడు. ఇప్ప‌టికే రెండు తెలుగు రాష్ట్రాల్లో రూ.110 కోట్ల రూపాయ‌ల ప్రీ రిలీజ్ బిజినెస్ జ‌రిగింద‌ని స‌మాచారం. ఇప్పుడు డిజిట‌ల్ మార్కెటింగ్‌ల సైరా సెన్సేష‌న్‌కు తెర తీసింది. వివ‌రాల ప్ర‌కారం ఈ సినిమా డిజిట‌ల్ హ‌క్కుల‌ను అమెజాన్ ప్రైమ్ సంస్థ రూ.40 కోట్లు చెల్లించి ద‌క్కించుకుంద‌ని టాక్‌. ఇంత భారీ మొత్తంలో డిజిట‌ల్ రైట్స్ ద‌క్కించుకున్న ద‌క్షిణాది సినిమా సైరా న‌ర‌సింహారెడ్డి కావ‌డం విశేష‌మ‌ని సినీ వ‌ర్గాల స‌మాచారం.

సురేంద‌ర్ రెడ్డి ద‌ర్శ‌క‌త్వంలో రామ్‌చ‌ర‌ణ్ నిర్మాత‌గా ఈ సినిమా నిర్మిత‌మ‌వుతోంది. అమితాబ్ బ‌చ్చ‌న్‌, నయ‌న‌తార‌, విజ‌య్ సేతుప‌తి, కిచ్చా సుదీప్‌, జ‌గ‌ప‌తిబాబు, ర‌వికిష‌న్‌, నిహారిక‌, త‌మ‌న్నా, నిహారిక‌ త‌దిత‌రులు కీల‌క పాత్ర‌ధారులుగా న‌టించారు. ఈ సినిమాను అక్టోబ‌ర్ 2న విడుద‌ల చేసేలా స‌న్నాహాలు జ‌రుగుతున్నాయి. సినిమాను తెలుగు, హిందీ, త‌మిళ‌, క‌న్న‌డ‌, మ‌ల‌యాళ భాష‌ల్లో గ్రాండ్ రిలీజ్ చేస్తున్నారు. ఈ నెల‌లోనే ఆడియో వేడుక‌ను క‌ర్నూలులో నిర్వ‌హిస్తార‌ని వార్త‌లు విన‌ప‌డుతున్నాయి. ఈ వేడుక‌కి బాలీవుడ్ బిగ్ బి అమితాబ్‌, సూప‌ర్‌స్టార్ ర‌జ‌నీకాంత్ ముఖ్య అతిథులుగా వ‌చ్చేస్తార‌ని వార్త‌లు విన‌ప‌డుతున్నాయి. భారీ అంచ‌నాల‌తో సినిమా భారీ లెవ‌ల్లో విడుద‌ల‌కు సిద్ధ‌మ‌వుతోంది.