కరోనా సెకండ్ వేవ్ కారణంగా ఎవరూ థియేటర్లకు వెళ్లే పరిస్థితి లేదు. దీంతో ఇప్పుడు రిలీజ్ అవ్వాల్సిన సినిమాలన్నీ వెనక్కి వెళ్లిపోతున్నాయి. ఈ క్రమంలో మెయిన్‌టైన్ చేయలేక థియేటర్ యాజామాన్యాలు సైతం థియేటర్లను తాత్కాలికంగా మూసివేశాయి. అయితే ఇప్పటికే చాలా సినిమాలు రిలీజ్‌కు సిద్ధంగా ఉన్నాయి. అవన్నీ రిలీజ్ డేట్స్‌ను వాయిదా వేసుకున్నాయి. దీంతో రానున్న రోజుల్లో బాక్సాఫీస్ వద్ద భారీగా పోటీ నెలకోవడం ఖాయమని ఇండస్ట్రీలో టాక్ నడుస్తోంది.

ఈ నెలలో రిలీజ్ కావాల్సిన గొపీచంద్ 'సీటీమార్', శేఖర్ కమ్ముల 'లవ్ స్టోరి', నాని నటించిన 'టక్ జగదీష్', రానా - సాయి పల్లవిల 'విరాట పర్వం' సినిమాలతో పాటు మెగాస్టార్ చిరంజీవి హీరోగా కొరటాల శివ దర్శకత్వంలో రూపొందుతున్న 'ఆచార్య' సినిమాని సైతం పోస్ట్‌పోన్ చేస్తున్నట్టు ఆయా చిత్రాల మేకర్స్ ప్రకటించారు. మళ్ళీ ఈ సినిమా రీ షెడ్యూల్ డేట్ ఎప్పుడనే విషయంలో మాత్రం క్లారిటీ ఇవ్వలేదు. ఇక మేలో రిలీజ్ ప్లాన్ చేసుకున్న నందమూరి బాలకృష్ణ - బోయపాటి శ్రీనుల 'అఖండ', మాస్ మహారాజ రవితేజ డ్యూయల్ రోల్‌లో నటిస్తున్న 'ఖిలాడి' సినిమాల విషయంలో మాత్రం ఇప్పటి వరకూ ఆయా చిత్ర బృందాలు ఎలాంటి క్లారిటీ ఇవ్వలేదు.

వీటన్నింటినీ పక్కనబెడితే మరో ఆసక్తికర విషయం సోషల్ మీడియాలో వైరల్ అవుతోంది. అయితే స్టైలిష్ స్టార్ అల్లు అర్జున్ నటించిన 'పుష్ప' ఆగస్టు 13న భారీ స్థాయిలో 5 భాషలలో రిలీజ్ చేయనున్నట్టు ఇంతకముందే ప్రకటించారు. అప్పటికి పరిస్థితులు కొంతమేర చక్కబడి ఈ సినిమా రిలీజ్ అయ్యే అవకాశాలు భారీగానే కనిపిస్తున్నాయి. మరోవైపు ‘ఆచార్య’ తదుపరి రిలీజ్ డేట్ విషయంలో మేకర్స్ ఎలాంటి క్లారిటీ ఇవ్వకున్నా కూడా ఈ చిత్రం ఆగస్ట్ రెండవ వారంలో తప్పక విడుదలవుతుందని టాక్ నడుస్తోంది. మొత్తానికి మెగాస్టార్‌ని స్టైలిష్ స్టార్ ఢీకొట్టడం ఖాయమని ఇండస్ట్రీలో గుసగుసలు వినిపిస్తున్నాయి. ఇదే నిజమైతే మామా.. మేనల్లుళ్లలో ఎవరు ఎక్కువ సందడి చేస్తారో చూడాలి.