మెగా క్యాంప్ క‌థానాయ‌కులు సాయిధ‌ర‌మ్ తేజ్‌, వ‌రుణ్ తేజ్ ఒకే రోజు త‌మ త‌మ కొత్త చిత్రాల‌తో పోటాపోటీగా బ‌రిలోకి దిగుతున్న సంగ‌తి తెలిసిందే. సీనియ‌ర్ ద‌ర్శ‌కుడు వి.వి.వినాయ‌క్ ద‌ర్శ‌క‌త్వంలో సాయిధ‌ర‌మ్ తేజ్ క‌థానాయ‌కుడిగా ఇంటిలిజెంట్ పేరుతో రూపొందిన తాజా చిత్రం ఫిబ్ర‌వ‌రి 9న విడుద‌ల‌కి సిద్ధ‌మ‌వ్వ‌గా.. అదే రోజు నూత‌న ద‌ర్శ‌కుడు వెంకీ అట్లూరి ద‌ర్శ‌క‌త్వంలో వ‌రుణ్ తేజ్ న‌టించిన తొలి ప్రేమ సినిమా కూడా రిలీజ్ కాబోతోంది.

ఆస‌క్తిక‌ర‌మైన విష‌య‌మేమిటంటే.. ఈ రెండు సినిమాల్లోనూ హీరో పాత్ర‌లు.. సాఫ్ట్‌వేర్ ఇంజినీర్స్ కావ‌డం. ఒకే త‌ర‌హా పాత్ర‌ల‌తో ఒకే రోజున ఒకే కుటుంబానికి చెందిన ఇద్ద‌రు క‌థానాయ‌కులు తెర‌పై సంద‌డి చేయ‌డం అనేది ప్ర‌త్యేక‌మైన విష‌య‌మే. మ‌రి.. వీరిలో ఎవ‌రు త‌మ పాత్ర‌తో అల‌రిస్తారో అన్న‌ది తెలియాలంటే.. వ‌చ్చే నెల 9 వ‌ర‌కు వెయిట్ చేయాల్సిందే. ఇంటిలిజెంట్ చిత్రంలో లావ‌ణ్య త్రిపాఠి క‌థానాయిక‌గా న‌టించ‌గా.. తొలి ప్రేమ‌లో రాశి ఖ‌న్నా క‌థానాయిక‌గా న‌టించింది. ఈ రెండు చిత్రాల‌కీ త‌మ‌న్ స్వ‌ర‌క‌ర్త కావ‌డం గ‌మ‌నార్హం.