అదే మెగా ఫ్యామిలీ.. అదే నాగ్ ఫ్యామిలీ
- IndiaGlitz, [Sunday,April 01 2018]
20 ఏళ్ళ క్రితం విడుద‌లై సంచ‌ల‌న విజ‌యం సాధించిన ప్రేమ‌క‌థా చిత్రం తొలిప్రేమ. ప‌వ‌ర్ స్టార్ ప‌వ‌న్ క‌ళ్యాణ్ క‌థానాయ‌కుడిగా న‌టించిన ఈ చిత్రం ద్వారా ఎ.కరుణాక‌ర‌న్ ద‌ర్శ‌కుడిగా ప‌రిచ‌య‌మ‌య్యారు. తొలి చిత్రంతోనే ప‌రిశ్ర‌మ దృష్టిని ఆక‌ర్షించారు. అలా.. రెండో చిత్రం నాగార్జున కుటుంబానికి చెందిన సుమంత్‌తో చేశారు కరుణాక‌ర‌న్. యువ‌కుడు పేరుతో రూపొందిన ఈ సినిమా క‌మ‌ర్షియ‌ల్‌గా వ‌ర్క‌వుట్ కాక‌పోయినా.. సుమంత్‌కు మంచి పేరు తీసుకువ‌చ్చింది.
క‌ట్ చేస్తే.. మ‌ళ్ళీ అదే తొలిప్రేమ టైటిల్‌తో 20 ఏళ్ళ త‌రువాత మ‌రో సినిమా వ‌చ్చింది. అదే మెగా ఫ్యామిలీకి చెందిన వ‌రుణ్ తేజ్ హీరోగా రూపొందిన ఈ చిత్రం ద్వారా వెంకీ అట్లూరి ప‌రిచ‌య‌మ‌య్యారు. విజ‌యం సాధించిన ఈ సినిమాతో ప‌రిశ్ర‌మ దృష్టిలో ప‌డ్డారు. ఫ‌లితంగా.. రెండో చిత్రం నాగార్జున రెండో త‌న‌యుడు అఖిల్‌తో చేసే అవ‌కాశం ద‌క్కింది. మొత్త‌మ్మీద.. ఒకే టైటిల్‌తో ఒకే ఫ్యామిలీకి చెందిన హీరోల సినిమాల ద్వారా ప‌రిచ‌య‌మైన ద‌ర్శ‌కులు.. రెండో చిత్రాలు కూడా ఒకే ఫ్యామిలీ హీరోల‌తో చేస్తుండ‌డం విశేష‌మ‌నే చెప్పాలి.