சிவகார்த்திகேயன் படத்தை அடுத்து மேலும் பிரபல நடிகரின் படத்தில் மீராமிதுன்
- IndiaGlitz, [Tuesday,August 13 2019]
பிக்பாஸ் 3 நிகழ்ச்சியின் போட்டியாளர்களில் ஒருவராகிய மீராமிதுன், சர்ச்சைக்குரிய போட்டியாளர்களில் ஒருவராக காணப்பட்டார். பிக்பாஸ் வீட்டில் இருக்கும்போது சக போட்டியாளர்கள் மீது பழிசுமத்துவது அவரது வழக்கமாக இருந்தது. குறிப்பாக அவர் சேரன் மீது சுமத்திய அபாண்டமான குற்றச்சாட்டால் பார்வையாளர்களால் வெறுக்கப்பட்டார். பிக்பாஸ் வீட்டை விட்டு வெளியேறிய பின்னரும் அவர் தனது தவறை உணர்ந்ததாக தெரியவில்லை என்பது அவரது பேட்டிகளில் இருந்து தெரிய வருகிறது
இந்த நிலையில் சிவகார்த்திகேயன் நடிப்பில் பாண்டிராஜ் இயக்கத்தில் சன் பிக்சர்ஸ் தயாரிப்பில் உருவாகி வரும் 'நம்ம வீட்டு பிள்ளை' திரைப்படத்தில் மீராமிதுன் ஒரு கேரக்டரில் நடித்து வருகிறார் என்பதை ஏற்கனவே பார்த்தோம். தற்போது மேலும் ஒரு படத்தில் நடிக்க அவருக்கு வாய்ப்பு கிடைத்துள்ளது
'மூடர் கூடம்' நவீன் இயக்கத்தில் விஜய் ஆண்டனி, அருண்விஜய் நடித்து வரும் திரைப்படம் 'அக்னிசிறகுகள்'. இந்த படத்தின் நாயகியாக ஷாலினி பாண்டே நடித்து வரும் நிலையில் தற்போது மீராமிதுனும் முக்கிய கேரக்டரில் நடிக்க ஒப்பந்தமாகியிருப்பதாக செய்திகள் வெளிவந்துள்ளது. நான்காவது வாரத்திலேயே பிக்பாஸ் வீட்டில் இருந்து வெளியே வந்துவிட்டாலும் மீராவுக்கு திரையுலகில் வாய்ப்புகள் குவிந்து வருகிறது என்பது குறிப்பிடத்தக்கது