టాలీవుడ్ యంగ్ టైగర్ ఎన్టీఆర్ ఫ్యాన్స్ తనను వేధిస్తున్నారంటూ బాలీవుడ్ నటి మీరా చోప్రా హైదరాబాద్ సైబర్ క్రైమ్ పోలీసులకు ఫిర్యాదు చేసిన విషయం తెలిసిందే. ఇప్పటికే హైదరాబాద్ పోలీసులు పలువుర్ని గుర్తించారు. అయితే మీరా.. ఏకంగా మంత్రి కేటీఆర్‌కే ట్వీట్ చేసి వారిని కఠినంగా శిక్షించాలని కోరడంతో సీన్ మారిపోయింది. ఈ కేసు విచారణను వేగవంతం చేసిన పోలీసులు మొత్తం 15 మంది ట్విట్టర్‌ ఖాతాలను పోలీసులు గుర్తించినట్లు తెలుస్తోంది. అనంతరం ఆ ఖాతాలను ఉపయోగిస్తున్న వారికి నోటీసులు పంపించారు. వారందరినీ త్వరలోనే పోలీసులు అరెస్టు చేయనున్నట్లు సమాచారం.

సూపర్ స్టార్ మహేశ్ బాబు అంటే ఇష్టమని.. జూనియర్ ఎన్టీఆర్ ఎవరో తెలియదని మీరా చెప్పడమే పెద్ద మిస్టేక్.! ఈ ఒక్క మాటను పట్టుకున్న ఎన్టీఆర్ ఫ్యాన్స్‌ మీరాను దుమ్మెత్తి పోస్తున్నారు. తీవ్ర అసభ్య పదజాలంతో మెసేజ్‌లు చేయడం.. కొందరు అభిమానులు అయితే ఏకంగా చంపేస్తామని బెదిరించడం, గ్యాంగ్ రేప్ చేస్తామని ఈ విషయాలకు సంబంధించిన స్క్రీన్ షాట్లను జోడిస్తూ పోలీసులకు మీరా ఫిర్యాదు చేసింది. అభిమానుల అత్యుత్సాహం టాలీవుడ్ యంగ్ టైగర్ ఎన్టీఆర్‌కు పెద్ద తలనొప్పిగా మారింది. కాగా.. ఏపీ ప్రభుత్వం కూడా ఈ వ్యవహారంలో కలగజేసుకోవాలంటూ మీరా ఫిర్యాదు చేసింది. అయితే ఇంతవరకూ ఎన్టీఆర్ నుంచి ఎలాంటి ప్రకటన కానీ రాకపోవడం గమనార్హం.