ஆஸ்திரேலியாவில் நடைபெற்று வரும் காமன்வெல்த் விளையாட்டு போட்டியில் இந்திய வீரர்கள், வீராங்கனைகள் பதக்கங்களை குவித்து வரும் நிலையில் இந்தியாவின் நம்பிக்கை நட்சத்திரமான மேரிகோம் இன்று தங்கம் வென்று இந்தியாவுக்கு மேலும் பெருமை சேர்த்துள்ளார்.

காமன்வெல்த் மகளிர் 48 கிலோ குத்துச்சண்டை போட்டியில் இந்தியாவின் மேரிகோம், வடக்கு அயர்லாந்து நாட்டின் வீராங்கனை கிறிஸ்டினாவை தோற்கடித்து தங்கம் வென்றார்.  தங்கம் வென்ற தங்கமங்கை மேரிகோம் அவர்களுக்கு ஜனாதிபதி ராம்நாத் கோவிந்த், துணை ஜனாதிபதி வெங்கையா நாயுடு, பிரதமர் நரேந்திரமோடி,  கிரிக்கெட் வீரர் சேவாக், முகம்மது கைஃப் உள்ளிட்ட பல பிரபலங்கள் வாழ்த்து தெரிவித்துள்ளனர்.

மேரிகோம் வென்ற தங்கப்பதக்கத்தின் மூலம் இந்தியா 18வது தங்கப்பதக்கத்தை வென்றுள்ளது மேலும் 11 வெள்ளி, 14 வெண்கலம் என மொத்தம் 43 பதக்கங்களை இந்தியா  வென்று 3வது இடத்தில் உள்ளது. 170 பதக்கங்களுடன் ஆஸ்திரேலியா முதலிடத்திலும், 102 பதக்கங்களுடன் இங்கிலாந்து 2வது இடத்திலும் தொடர்கிறது என்பது குறிப்பிடத்தக்கது.