రాష్ట్రంలో కాంగ్రెస్ పార్టీ ఎక్కడ ఉందని బీజేపీ మోర్చా రాష్ట్ర ఉపాధ్యక్షులు మారుతి కిరణ్ బూనేటి ఎద్దేవా చేశారు. కాంగ్రెస్‌ పార్టీకి సరైన క్యాడర్ కూడా లేదన్నారు. టికెట్లు అమ్ముకునే పార్టీ కాంగ్రెస్ అని తీవ్ర ఆరోపణలు చేశారు. టికెట్లు అమ్ముకుంటున్నారని కాంగ్రెస్ నేతలే ఆరోపణలు చేస్తున్నారని తెలిపారు. ఇక అభ్యర్థులు జాబితా రిలీజ్ చేస్తే ఆ పార్టీలో ఎంత అసంతృప్తి వస్తుందో చూడండన్నారు. అలాంటి పార్టీ గురించి తాము ఏం మాట్లాడటం కూడా అనవసరమని పేర్కొన్నారు. 2018లో గెలిచిన కాంగ్రెస్ ఎమ్మెల్యేలు బీఆర్ఎస్‌లోకి వెళ్లారని.. ఇప్పుడు కూడా కాంగ్రెస్ నుంచి గెలిచిన కేసీఆర్ దగ్గరకి వెళ్తారని ఆరోపించారు. ఆ రెండు పార్టీలు ఒక్కటేనని కాంగ్రెస్ అభ్యర్థులకు ఓటు వేస్తే బీఆర్ఎస్‌కు వేసినట్లేనని ఆయన వివరించారు.

కాంగ్రెస్ పోటీలోనే లేదు.. బీజేపీ-బీఆర్ఎస్ మధ్యే ప్రధాన పోటీ..

గ్రేటర్ హైదరాబాద్ ఎన్నికలతో పాటు దుబ్బాక, హుజురాబాద్, మునుగోడు ఉప ఎన్నికల్లో కనీసం ఆ పార్టీకి డిపాజిట్లు కూడా రాలేదని.. అలాంటి పార్టీ పోటీలో ఎలా ఉంటుందని ప్రశ్నించారు. జీహెచ్‌ఎంసీతో పాటు దుబ్బాక, హుజురాబాద్ ఉప ఎన్నికల్లో బీజేపీ ఘన విజయం సాధించిందన్నారు. మునుగోడు ఎన్నికలో కూడా రాజగోపాల్ రెడ్డి గెలిచేవారని.. కానీ బీఆర్ఎస్ కోట్లు ఖర్చు పెట్టి, ఓటర్లను బెదిరించి గెలిచిందన్నారు. అయినా కానీ రాజగోపాల్ రెడ్డికి పెద్ద ఎత్తును ఓట్లు వచ్చిన విషయాన్ని గుర్తు చేశారు. ఎన్నికల్లో బీజేపీ-బీఆర్ఎస్ మధ్య ప్రధాన పోటీ ఉంటుందని మారుతి కిరణ్ స్పష్టం చేశారు.