మారుతి పేరు చెప్ప‌గానే అంచ‌లంచ‌లుగా ఎదిగిన ద‌ర్శ‌కుడు అనే మాట చ‌టుక్కున గుర్తుకొస్తుంది. సినిమాల్లోకి రాక‌ముందు యానిమేట‌ర్‌గా ప‌నిచేశారు మారుతి. ఆయ‌న‌కు ఆ అనుభ‌వం సినిమాల్లోనూ ఉప‌యోగ‌ప‌డింది. షాట్ డివిజ‌న్‌, బ్లాగ్స్ పెట్ట‌డంలో ఆయ‌నదైన శైలి క‌నిపించ‌డానికి ఈ అనుభ‌వం కూడా తోడైంద‌న్న‌ది వాస్త‌వం. ఇప్పుడు ఆ అనుభ‌వాల‌ను రంగ‌రించి మారుతి మ‌రో అడుగు ముందుకు వేయాల‌ని అనుకుంటున్నారు. పూర్తి స్థాయి యానిమేటెడ్ సినిమాను రూపొందించాల‌ని సంక‌ల్పిస్తున్న‌ట్టు చెప్పారు.

అన్న‌ట్టు మారుతి ప్ర‌స్తుతం బాబు బంగారం అనే సినిమాకు ద‌ర్శ‌క‌త్వం వ‌హిస్తున్నారు. వెంక‌టేష్ హీరోగా న‌టిస్తున్న సినిమా ఇది. న‌య‌న‌తార నాయిక‌గా న‌టిస్తోంది. జులైలో ఈ సినిమాను విడుద‌ల చేయ‌డానికి స‌న్నాహాలు జ‌రుగుతున్నాయి. గిబ్ర‌న్ సంగీతాన్ని అందిస్తున్నారు. ఇటీవ‌ల త‌మ సొంత ప్రాంతానికి వెళ్ళిన మారుతి యానిమేష‌న్ గురించి త‌న మ‌న‌సులో ఉన్న మాట‌ను బ‌య‌ట‌పెట్టార‌న్న‌మాట‌.