நடிகர் மன்சூர் அலிகானின் ஜாமீன் மனுவை விசாரணை செய்த செங்கல்பட்டு நீதிமன்றம் அவருக்கு நிபந்தனை ஜாமீன் வழங்கி உத்தரவிட்டுள்ளது.

சமீபத்தில் பாரத பிரதமர் தமிழகத்திற்கு வருகை தந்தபோது கருப்புக்கொடி காட்டியதற்காக சீமான், பாரதிராஜா உள்ளிட்டவர்களை கைது செய்த போலீசார் பல்லாவரத்தில் உள்ள ஒரு திருமண மண்டபத்தில் தங்க வைத்தனர். இந்த நிலையில் இவர்களில் சீமானை மட்டும் வேறொரு வழக்கில் கைது செய்ய போலீசார் முயற்சி செய்ததாக தகவல் பரவியது

இதனையடுத்து அந்த மண்டபத்தை சுற்றி நாம் தமிழர்கள் தொண்டர்கள் குவிந்தனர். அவர்களுடன் நடிகர் மன்சூர் அலிகானும் இணைந்து போலீசாரிடம் வாக்குவாதம் செய்தார். சீமானை கைது செய்வதாக இருந்தால் தன்னையும் கைது செய்யும்படி அவர் போலீசாரிடம் வாக்குவாதம் செய்தார்

இந்த நிலையில் மறுநாள் கைது செய்யப்பட்ட மன்சூர் அலிகான் நீதிமன்றத்தில் ஆஜர்செய்யப்பட்டு பின்னர் புழல் சிறையில் அடைக்கப்பட்டார்.

இந்த நிலையில் மன்சூர் அலிகான் தரப்பினர் அவரை ஜாமீனில் விடுவிடுக்கும்படி தாக்கல் செய்திருந்த மனு இன்று செங்கல்பட்டு நீதிமன்றத்தில் விசாரணைக்கு வந்தது இந்த மனுவை விசாரணைக்கு ஏற்றுக்கொண்ட நீதிபதி, மன்சூர் அலிகானுக்கு நிபந்தனை ஜாமீன் வழங்கி உத்தரவிட்டார்