టాలీవుడ్ సీనియర్ నటుడు, నిర్మాత మంచు మోహన్ బాబు రెండో కుమారుడు మంచు మనోజ్ ఇటీవలే తన భార్య ప్రణతీతో విడాకులు తీసుకున్న సంగతి తెలిసిందే. కుటుంబంలో తలెత్తిన కొన్ని సమస్యల వల్ల చాలా ఇబ్బంది పడ్డానని అందుకే సామరస్యంగా ఎవరికివారుగా విడిపోతున్నట్లు ప్రకటించాడు. ఈ క్రమంలో తాను మళ్లీ సినిమాల్లోకి రీ ఎంట్రీ ఇస్తానని.. ఇక నటించడమే తన పనని మనోజ్ నిశితంగా వివరించాడు. అయితే అనుకున్నట్లుగానే మనోజ్ సెకండ్ ఇన్నింగ్స్ మొదలుపెట్టాడు. అది కూడా దీపావళి పండుగ శుభసందర్భంగా తన అభిమానులకు మనోజ్ తియ్యటి శుభవార్త చెప్పారు.

ఇదీ మనోజ్ కొత్త జర్నీ..

ఇకపై తాను సినిమాల్లో హీరోగా నటించడమే కాకుండా.. సినిమాలనూ నిర్మిస్తానని అంటే నిర్మాతగా మారుతున్నట్లు ప్రకటించారు. ఇందులో భాగంగా కొత్త బ్యానర్‌ను మనోజ్ ప్రారంభిస్తున్నట్లు తెలిపారు. కాగా ఆ బ్యానర్‌కు ఎం.ఎం(మంచు మనోజ్) ఆర్ట్స్ అనే పేరు పెడుతున్నట్లు చెప్పుకొచ్చాడు. ఇకపై తాను ఈ బ్యానర్‌ కిందే సినిమాలు చేస్తానని.. అంతేకాకుండా కొత్త టాలెంట్‌ను బ‌య‌ట‌కు తీసుకువ‌స్తానన్నాడు. అంటే.. కొత్త నటీనటులగా మంచి అవకాశమిస్తానని చెప్పకనే చెప్పారన్న మాట. మున్ముంథు భ‌విష్యత్తులో గొప్ప సినిమాల‌ను అందించాల‌ని అనుకుంటున్నట్లు మనోజ్ చెప్పుకొచ్చాడు. మొత్తానికి చూస్తే మంచు మనోజ్ సెకండ్ ఇన్నింగ్స్ గట్టిగానే ప్రారంభించాడు. ఆల్ ది బెస్ మనోజ్.