లెజెండరీ డైరెక్టర్ మణిరత్నం దర్శకత్వంలో 'నవాబ్' (తమిళంలో 'చెక్క చివంత వానం') పేరుతో ఓ మ‌ల్టీస్టార‌ర్ మూవీ తెరకెక్కుతున్న విషయం తెలిసిందే. ఇందులో అరవింద్ స్వామి, శింబు, విజయ్ సేతుపతి, అరుణ్ విజయ్, జ్యోతిక, అదితిరావ్ హైదరి, ఐశ్వర్యా రాజేష్, ప్రకాష్ రాజ్, జయసుధ కీలక పాత్రలు పోషిస్తున్నారు.

లైకా ప్రొడక్షన్స్, మద్రాస్ టాకీస్ సంయుక్తంగా నిర్మిస్తున్న ఈ సినిమాకి ఎ.ఆర్.రెహమాన్ సంగీతం అందిస్తున్నారు. ఇదిలా ఉంటే.. నలుగురు వ్యక్తుల జీవితాలను విశ్లేషించే కథగా ఈ చిత్రం ఉంటుందనీ.. ఈ నేపథ్యంలో తమిళనాడులోని ఓ ముఖ్యమైన సామాజిక - రాజకీయ సమస్యను పరిష్కరించే దిశగా సాగే అంశాలను కూడా ఈ సినిమాలో ట‌చ్ చేయ‌బోతున్నట్లు తెలుస్తోంది.

తాజాగా.. అరవింద్ స్వామి పై కొన్ని కీలక సన్నివేశాలను చిత్రీకరించారు. ఈ చిత్రీక‌ర‌ణ‌తో తన షూటింగ్ పార్టును పూర్తి చేసుకున్న అరవింద్ స్వామి.. డైరెక్టర్ మణిరత్నం, సినిమాటోగ్రాఫర్ సంతోష్ శివన్‌తో కలిసి పనిచేయడం చాలా ఆనందంగా ఉందని  పేర్కొన్నారు. ప్రస్తుతం చెన్నైలో శరవేగంగా చిత్రీకరణ జరుపుకుంటున్న ఈ చిత్రం.. ఈ ఏడాది  చివ‌ర‌లో తెరపైకి రానుంది.