பிரபல இயக்குனர் மணிரத்னம் இயக்கவுள்ள அடுத்த படமான 'செக்க சிவந்த வானம்' திரைப்படத்தின் முழு விபரங்களுடன் கூடிய ஃபர்ஸ்ட்லுக் நேற்று வெளியானது குறித்து பார்த்தோம். இந்த படத்தின் படப்பிடிப்பு இம்மாத இறுதியில் தொடங்கவுள்ளது.

பொதுவாக மணிரத்னம் படம் என்றாலே மாதக்கணக்கில் அல்லது வருடக்கணக்கில் படமாக்கப்படும் என்பதே கடந்த கால வரலாறு. ஆனால் இந்த படம் மிகச்சரியாக திட்டமிட்டு மொத்த படப்பிடிப்பையும் 55 நாட்களில் முடிக்கவுள்ளதாக தகவல்கள் வெளிவந்துள்ளது. அதாவது இரண்டு மாதங்களில் மொத்த படப்பிடிப்பும் முடிந்துவிடும் என்று கூறப்படுகிறது. திட்டமிட்டபடி அனைத்தும் சரியாக நடந்தால் இந்த படம் வரும் ஜூன் மாதம் வெளியாக அதிக வாய்ப்பு இருப்பதாக கூறப்படுகிறது.

அரவிந்த்சாமி, சிலம்பரசன், விஜய்சேதுபதி, அருண் விஜய், பிரகாஷ்ராஜ், தியாகராஜன், மன்சூர் அலிகான், ஜெயசுதா, ஜோதிகா, அதிதி ராவ், ஐஸ்வர்யா ராஜேஷ், டயானா உள்ளிட்ட பலர் நடிக்கும் இந்த படத்தின் படப்பிடிப்பு இந்தியா, துபாய் உள்பட பல முக்கிய இடங்களில் நடைபெறவுள்ளது. ஏ.ஆர்.ரஹ்மான் இசையில், சந்தோஷ் சிவன் ஒளிப்பதிவில், ஸ்ரீகர் பிரசாத் படத்தொகுப்பில், வைரமுத்து பாடல் வரிகளில் உருவாகவுள்ள இந்த படம் இந்த ஆண்டின் மிகப்பெரிய எதிர்பார்ப்புக்குரிய படம் என்பது குறிப்பிடத்தக்கது.