ద‌స‌రా కానుక‌గా అక్టోబ‌ర్ 7న మన ఊరి రామాయణం..!
- IndiaGlitz, [Saturday,September 03 2016]
జాతీయ ఉత్తమనటుడు ప్రకాష్ రాజ్ స్వీయ దర్శకత్వంలో నటిస్తూ నిర్మించిన ద్విభాషా చిత్రం మన ఊరి రామాయణం. ఈ చిత్రంలో ప్రకాష్ రాజ్, ప్రియమణి, సత్యదేవ్, పృథ్వి, రఘుబాబు ప్రధాన పాత్ర‌లు పోషించారు.ఈ చిత్రాన్ని క‌న్న‌డ‌లో ఇదొల్లె రామాయణ అనే టైటిల్ తో రిలీజ్ చేయ‌నున్నారు. షూటింగ్ పూర్తి చేసుకున్న ఈ చిత్రం ప్రస్తుతం నిర్మాణానంతర కార్యక్రమాలు జ‌రుపుకుంటుంది. ద‌స‌రా కానుక‌గా అక్టోబ‌ర్ 7న మన ఊరి రామాయణం చిత్రాన్ని రిలీజ్ చేయ‌నున్న‌ట్టు ప్రకాష్ రాజ్ ట్విట్ట‌ర్ ద్వారా తెలియ‌చేసారు.
ఈ చిత్రక‌థ గురించి చెప్పాలంటే...సమాజంలో ఎంతో గౌరవించబడే ఒక వ్యక్తి జీవితంలో శ్రీరామనవమి సమయంలో జరిగినటువంటి ఒక సంఘటన తన జీవితాన్ని ఏ విధంగా మలుపు తిప్పింది అనే క‌థాంశంతో ఈ చిత్రం తెరకెక్కింది. ప్రతి మ‌నిషి లో ఒక రాముడు ఒక రావణుడు వుంటాడు అని తెలియ‌చెప్పే చిత్రం ఇది. ఒక్క ముక్కలో చెప్పాలంటే... ఇది మనందరి రామాయణం. మన ఊరి రామాయణం. రెగ్యుల‌ర్ చిత్రాల‌కు భిన్నంగా వైవిధ్య‌మైన చిత్రాలు తీసే ప్రకాష్ రాజ్ కి మన ఊరి రామాయణం ఎలాంటి ఫ‌లితాన్ని అందిస్తుందో చూడాలి.