టాలీవుడ్‌తో పాటు యావత్ భారతీయ చిత్ర పరిశ్రమ ఎంతో ఉత్కంఠగా ఎదురుచూసిన చిత్రం ‘‘ఆర్ఆర్ఆర్’’. ఎన్నో అవాంతరాలను దాటుకుని ఈ సినిమా ఈరోజు ప్రేక్షకుల ముందుకు వచ్చింది. దీంతో తెలుగు నాట థియేటర్ల వద్ద పండుగ వాతావరణం నెలకొంది. భారీ కటౌట్లు, ఫ్లెక్సీలు, పాలాభిషేకాలతో అభిమానులు సందడి చేస్తున్నారు. అటు స్పెషల్ షోలకు ప్రభుత్వం అనుమతి ఇవ్వడంతో ఫ్యాన్స్ టికెట్ల కోసం ఎగబడ్డారు. అయితే సినిమా రిలీజ్ సందర్భంగా కొన్ని చోట్ల అపశృతులు చోటు చేసుకుంటున్నాయి.

మెగా- నందమూరి అభిమానుల మధ్య చిన్న చిన్న మనస్పర్ధలు.. చిన్న చిన్న గొడవలు జరుగుతూనే ఉన్నాయి. టికెట్లు సంపాదించే విషయంలోనూ అభిమానులు నువ్వా నేనా అన్నట్టు ప్రవర్తిస్తున్నారు . చిత్తూరు జిల్లాలో టికెట్లు చించేసిన సంఘటనలు కూడా జరిగాయి. ఈ క్రమంలోనే ట్రిపుల్ ఆర్ చూస్తూనే ఓ అభిమాని ప్రాణాలు కోల్పోయాడు. అనంతపురం నగరంలో ఆర్ఆర్ఆర్ సినిమా చూస్తూ గుండెపోటుతో ఓ అభిమాని మృతి చెందాడు. శుక్రవారం ఎస్ వీ మ్యాక్స్ థియేటర్లో ఆర్ఆర్ఆర్ సినిమా బెనిఫిట్ షోలు వేయడంతో ఓబులేసు (30) అనే వ్యక్తి తన స్నేహితులతో కలిసి ప్రీమియర్ షోకి వెళ్లాడు. సినిమా చూస్తున్న సమయంలో ఒక్కసారిగా అతడికి గుండెపోటు వచ్చింది.

దీంతో వెంటనే అప్రమత్తమైన తోటి అభిమానులు అతనిని ట్రీట్మెంట్ కోసం హాస్పిటల్ కి తరలించారు. అయితే మార్గమధ్యంలోనే అతడు మృతి చెందినట్లు వైద్యులు ధ్రువీకరించారు. దీంతో ఓబులేసు కుటుంబసభ్యులు, సన్నిహితులు విషాదంలో కూరుకుపోయారు.