கள்ளநோட்டை அச்சடித்து புழக்கத்தில் விட்டதாக பிரபல மலையாள தொலைக்காட்சி நடிகை ஒருவர் கைது செய்யப்பட்டுள்ளார். அவருடன் அவருடைய சகோதரி மற்றும் தாயாரும் கைது செய்யப்பட்டுள்ளனர். மேலும் அவருடைய வீட்டில் ரூ.57 லட்சம் கள்ளநோட்டு பறிமுதல் செய்யப்பட்டது.

கேரளாவில் உள்ள கொல்லம் பகுதியில் ரூ.2000, ரூ.500 கள்ளநோட்டுக்கள் அதிகமாக நடமாடுவதாக போலீசாருக்கு புகார்கள் வந்து கொண்டிருந்தன. இந்த நிலையில் பிரபல சீரியல் நடிகை சூர்யா சசிகுமார் என்பவரது வீட்டில் கள்ள நோட்டு அச்சடிப்பதாக போலீசாருக்கு ரகசிய தகவல் கிடைத்தது. இதனையடுத்து அவருடைய வீட்டை போலீசார் ரகசியமாக நோட்டமிட்டனர். இதில் அவருடைய வீட்டுக்கு சந்தேகத்திற்கு இடமாக ஒருசிலர் வந்துபோவது தெரியவந்தது.

இதனையடுத்து போலீஸ் குழு ஒன்று சூரியா சசிகுமார் வீட்டிற்குள் அதிரடியாக புகுந்த சோதனை செய்தது. இந்த சோதனையில் நடிகை சூரியா சசிகுமார் தனது வீட்டின் மேல்பகுதியில் கள்ள நோட்டு அச்சடிக்க பயன்படுத்தி வந்தது தெரியவந்தது. மேலும் அந்த வீட்டில் ரூ.57 லட்சம் கள்ளநோட்டு, கம்ப்யூட்டர் உள்பட ஒருசில பொருட்களை போலீசார் பறிமுதல் செய்தனர்.

இதனையடுத்து கள்ளநோட்டு அச்சடித்து புழக்கத்தில் விட்டதற்காக நடிகை சூரியாவும், அவரது சகோதரி ஸ்ருதி மற்றும் அவரது தாயார் ரமாதேவி ஆகியோர் கைது செய்யப்பட்டனர். இந்த குற்றத்தில் சம்பந்தப்பட்ட இன்னும் சிலரை தேடி வருவதாகவும், விரைவில் அவர்கள் பிடிபடுவார்கள் என்றும் காவல்துறை அதிகாரிகள் தெரிவித்தனர்.