2016ஆம் ஆண்டு மலையாள திரையுலகிற்கு நேரமே சரியில்லை போலும். தொடர்ந்து மலையால திரையுலக பிரபலங்கள் அதுவும் நடுத்தர வயது நட்சத்திரங்கள் மரணம் அடைந்து வருகின்றனர்.

இந்த வருடத்தில் மட்டும் நடிகை கல்பனா, இயக்குனர் ராஜேஷ்பிள்ளை மற்றும் நடிகர் கலாபவண் மணி ஆகியோர் மரணம் அடைந்த அதிர்ச்சியில் இருந்தே மலையாள திரையுலகினர் இன்னும் மீண்டு வரவில்லை. இந்நிலையில் இயக்குனர் சாஜி பரவூர் (Saji Paravoor)என்பவர் இன்று மரணம் அடைந்தார்.

மலையாள சூப்பர் ஸ்டார் மோகன்லால் மற்றும் சுரேஷ்கோபி நடித்த 'ஜனகன்' என்ற படத்தை இயக்கியவர் இயக்குனர் சாஜி பரவூர். சுரேஷ் கோபி தனது மகளை பாலியல் பலாத்காரம் செய்தவர்களை பழிவாங்குவது போன்றும் அவருக்கு வழக்கறிஞரான மோகன்லால் உதவுவது போன்றும் கதை அமைக்கப்பட்டிருந்த இந்த படம் கேரள ரசிகர்களிடம் பெரும் வரவேற்பை பெற்றது.

இந்நிலையில் கடந்த சிலநாட்களாக உடல்நலமின்றி இருந்த இயக்குனர் சாஜி பரவூர் இன்று மரணம் அடைந்துவிட்டதாக அதிர்ச்சி கலந்த தகவல் வெளிவந்துள்ளது.