சீயான் விக்ரம், தமன்னா நடிப்பில் உருவாகி வரும் 'ஸ்கெட்ச்' படத்தை 'வாலு' பட இயக்குனர் விஜய்சந்தர் இயக்கி வருகிறார் என்பது தெரிந்ததே. இந்த படத்தின் படப்பிடிப்பு 85% முடிந்துவிட்டதாகவும், இந்த படம் வரும் செப்டம்பரில் ரிலீஸ் ஆகும் என்றும் படக்குழுவினர் தெரிவித்தனர்.

இந்த நிலையில் இந்த படத்தில் தற்போது பாபுராஜ் என்ற நடிகர் இணைந்துள்ளார். இவர் பிரபல மலையாள நடிகர் மட்டுமின்றி கடந்த 2004ஆம் ஆண்டு வெளிவந்த அஜித் நடித்த 'ஜனா' படத்தில் முக்கிய கேரக்டரில் நடித்தவர். தற்போது 13 வருடங்களுக்கு பின்னர் மீண்டும் கோலிவுட்டில் 'ஸ்கெட்ச்' படத்தின் மூலம் ரீஎண்ட்ரி ஆகிறார் என்பது குறிப்பிடத்தக்கது. இந்த படத்தில் பாபுராஜின் கேரக்டர் திருப்புமுனையை ஏற்படுத்தும் கேரக்டர் என்று இயக்குனர் விஜய்சந்தர் தெரிவித்துள்ளார்.

வடசென்னை பகுதியில் நடைபெறும் வகையில் கதையம்சம் கொண்ட இந்த படத்திற்கு எஸ்.எஸ்.தமன் இசையமைக்கின்றார். விக்ரம், தமன்னா, ஸ்ரீபிரியங்கா, ராதாரவி, சூரி, ஸ்ரீமான், ஆர்.கே.சுரேஷ், பாபுராஜ் உள்பட பலர் நடிக்கும் இந்த படத்தை கலைப்புலி எஸ்.தாணு தயாரித்து வருகிறார். சுகுமார் ஒளிப்பதிவில், ரூபன் படத்தொகுப்பில் இந்த படம் உருவாகி வருகிறது.