'காலா' ஜீப்பை கண்டுபிடித்து கொடுங்கள்: மஹிந்திரா சேர்மன் வேண்டுகோள்
- IndiaGlitz, [Monday,May 29 2017]
சூப்பர் ஸ்டார் ரஜினி நடிக்கும் 'காலா' படத்தின் ஃபர்ஸ்ட்லுக் சமீபத்தில் வெளிவந்து இணையதளங்களில் பெரும் வரவேற்பை பெற்றது. இந்த படத்தின் டைட்டில் போஸ்டரையும், ஃபர்ஸ்ட்லுக்கையும் வைத்து ரசிகர்களும் நெட்டிசன்களும் தமிழீழம் உள்பட பல கற்பனைகளை அவிழ்த்துவிட்டனர்.
இந்த நிலையில் ஃபர்ஸ்ட்லுக் போஸ்டரில் ரஜினி உட்கார்ந்திருக்கும் ஜீப்பிற்கு தற்போது திடீரென மாபெரும் மவுசு வந்துவிட்டது. இந்த ஜீப் இந்தியாவின் ஒரு முன்னணி நிறுவனத்தின் 'தார்' மாடல் ஜீப் ஆகும். இந்த நிறுவனத்தின் சேர்மன் தனது டுவிட்டரில், காலா' படத்தின் படப்பிடிப்பில் தார் ஜீப் பயன்படுத்துவது குறித்து யாருக்கேனும் தகவல் தெரிந்தால் உடனே எனக்கு தெரியப்படுத்தவும். அந்த காரை நாங்கள் விலைக்கு வாங்கி, எங்கள் நிறுவனத்தின் ஆட்டோ அருங்காட்சியகத்தில் வைக்கப் போகிறோம் என்று கூறியுள்ளார். ஆனால் மீண்டும் அடுத்த டுவீட்டில் 'அந்த கார் படத்தின் போஸ்டரில் போட்டோஷாப் செய்து பயன்படுத்தப்பட்டுள்ளதாகவும், அந்த கார் தற்போது ஒரு கலெக்டரிடம் இருப்பது தெரியவந்துள்ளதாகவும் அவர் தெரிவித்துள்ளார்.
இருப்பினும் ஒரு படத்தின் போஸ்டர் விமானத்தில் வரையப்படுவது, ஒரு படத்தின் ஃபர்ஸ்ட்லுக்கில் தோன்றிய ஜீப் அருங்காட்சியகத்தில் இடம்பெறுவது, இதெல்லாம் ரஜினி படங்களுக்கு மட்டுமே சாத்தியம் என்று ரஜினி ரசிகர்கள் சமூக வலைத்தளங்களில் பதிவு செய்து வருகின்றனர்.