సూప‌ర్‌స్టార్ మ‌హేశ్ ఈ ఏడాదితో ‘స‌రిలేరు నీకెవ్వ‌రు’ సినిమాతో సూప‌ర్ హిట్ సాధించిన సంగ‌తి తెలిసిందే. అయితే కాస్త గ్యాప్ తీసుకుని సూప‌ర్‌స్టార్ కృష్ణ పుట్టిన‌రోజు సంద‌ర్భంగా త‌న 27వ చిత్రం ‘సర్కారు వారి పాట’ సినిమాను అధికారికంగా ప్రకటించారు. లాక్డౌన్ కారణంగా సినిమా చిత్రీకరణ మొదలు కాలేదు. ఆగస్టులో సినిమా రెగ్యులర్ షూటింగ్ ప్రారంభమవుతుందని అనుకున్నారు. అయితే కరోనా ఎఫెక్ట్ ఇంకా త‌గ్గ‌డం లేదు. ఈ క్ర‌మంలో షూటింగ్ ప్రారంభిస్తే ఏమైనా ఇబ్బందులు ఎదుర‌య్యే అవ‌కాశాలు ఉన్నాయ‌ని మ‌హేశ్ భావిస్తున్నాడ‌ట‌.

అందువ‌ల్ల ఇంకా ఆల‌స్యంగానే షూటింగ్ స్టార్ట్ చేస్తామ‌ని అంటున్నాడట‌. సినీ వ‌ర్గాల్లో విన‌ప‌డుతున్న స‌మాచారం మేర‌కు డిసెంబ‌ర్‌లో ‘స‌ర్కారు వారి పాట‌’ షూటింగ్ ప్రారంభం అవుతుంద‌ని అంటున్నారు. మ‌రి సోష‌ల్ మీడియాలో విన‌ప‌డుతున్న ఈ వార్త‌ల‌పై చిత్ర యూనిట్ ఎలా స్పందిస్తుందో వేచి చూడాలి.

బ్యాంకుల‌ను మోసం చేసిన విల‌న్ నుండి తిరిగి డ‌బ్బులు రాబ‌ట్టే క‌థే ఈ సినిమా అని వార్త‌లు సోష‌ల్ మీడియాలో చ‌క్క‌ర్లు కొడుతున్నాయి. మైత్రీ మూవీ మేక‌ర్స్‌, జీఎంబీ ఎంట‌ర్‌టైన్‌మెంట్, 14 రీల్ ప్ల‌స్ బ్యాన‌ర్స్‌పై సినిమా నిర్మిత‌మ‌వుతోంది. త‌మ‌న్ ఈ చిత్రానికి సంగీతం అందిస్తుండ‌గా.. పి.ఎస్‌.వినోద్ సినిమాటోగ్ర‌ఫీ అందిస్తున్నాడు.