ప్రేక్షకులకు, అభిమానులకు తన సినిమాలో కొత్తదనం చూపించాలనుకుని తపన పడే నటులలో మహేష్ బాబు ఒకరు. అలాగే.. ఏదో ఒక సామాజిక అంశంతో సినిమాను తెరకెక్కించ‌డం దర్శకుడు కొరటాల శివ శైలి. అలాంటి వీరిద్దరి కలయికలో వస్తున్న 'భరత్ అనే నేను' సినిమా చిత్రీకరణ చివరి దశలో ఉంది. మ‌రోవైపు నిర్మాణానంతర పనులను కూడా చేపట్టింది చిత్ర బృందం. ఇందులో భాగంగా డబ్బింగ్ ప్రక్రియను కూడా ప్రారంభించారు.

త్వరలోనే మహేష్ బాబు కూడా డబ్బింగ్ చెప్పే అవకాశం ఉంది. ఇదిలా ఉంటే.. ఈ చిత్రంలో మహేష్ సమైఖ్యాంధ్ర ముఖ్యమంత్రిగా నటిస్తున్న సంగ‌తి తెలిసిందే. అందుకే డబ్బింగ్‌లో ప్రత్యేకతను తీసుకురావడం కోసం.. ప్రజలనుద్దేశించి రాజకీయ నాయకులు మాట్లాడే విధానం, మాస్ డైలాగ్స్‌తో.. ఆకట్టుకునే విధంగా ఉండేలా పక్కాగా ప్లాన్ చేసుకుంటున్నారు మహేష్.

దీనికోసం ప్రత్యేకంగా సమయాన్ని, షెడ్యూల్‌ను కూడా కేటాయించనున్నారని చిత్ర వర్గాలు వెల్లడిస్తున్నాయి. మరి మహేష్ చెప్పే ఆ స్పెషల్ డైలాగ్స్ వినాలంటే.. చిత్రం విడుదల తేదీ ఏప్రిల్ 26న వరకు వేచి ఉండాల్సిందే.