ఇటీవ‌లే స్పైడ‌ర్ సినిమాతో ప‌ల‌క‌రించారు సూప‌ర్‌స్టార్ మ‌హేష్‌బాబు. ప్ర‌స్తుతం ఆయ‌న కొర‌టాల శివ ద‌ర్శ‌క‌త్వంలో తెర‌కెక్కుతున్న భ‌ర‌త్ అనే నేనులో న‌టిస్తున్నారు. శ్రీ‌మంతుడు వంటి ఘ‌న‌విజ‌యం త‌రువాత ఈ ఇద్ద‌రి కాంబినేష‌న్‌లో వ‌స్తున్న‌ మూవీ ఇది. కాగా, ఈ సినిమా త‌రువాత త‌న త‌దుప‌రి చిత్రాన్ని వంశీ పైడిప‌ల్లి ద‌ర్శ‌క‌త్వంలో చేయ‌నున్నారు మ‌హేష్‌.

జ‌న‌వ‌రిలో సెట్స్‌పైకి వెళ్ల‌నున్న ఈ సినిమా.. కొన్ని కార‌ణాల వ‌ల్ల వాయిదా ప‌డింద‌ని తెలిసింది. భ‌ర‌త్ అనే నేను సినిమా విడుద‌లయ్యాకే.. ఈ సినిమాపై మ‌హేష్ దృష్టిపెట్టాల‌నుకుంటున్నార‌ని టాలీవుడ్ వ‌ర్గాలు పేర్కొంటున్నాయి. స్పైడ‌ర్ చిత్రం ఆశించిన విజ‌యం సాధించ‌క‌పోవ‌డంతో.. భ‌ర‌త్ అనే నేను విష‌యంలో మ‌రిన్ని జాగ్ర‌త్త‌లు తీసుకుంటున్నార‌ట మ‌హేష్‌.

అందుకే.. వంశీ పైడిప‌ల్లి చిత్రం రెగ్యుల‌ర్ షూటింగ్‌కి మ‌రింత స‌మ‌యం ప‌ట్టే అవ‌కాశ‌ముంద‌ని స‌మాచార‌మ్‌. కాగా, దేవిశ్రీ ప్ర‌సాద్ సంగీతంలో ఈ చిత్రానికి సంబంధించి ఇప్ప‌టికే పాట‌ల రికార్డింగ్ పూర్త‌య్యింది. ఈ సినిమాని అశ్వ‌నీద‌త్‌, దిల్ రాజు సంయుక్తంగా నిర్మించ‌నున్నారు.