సూపర్ స్టార్ మహేష్ బాబు, సెన్సేషనల్ డైరెక్టర్ కొరటాల శివ కాంబినేషన్లో వస్తోన్న సినిమా 'భరత్ అనే నేను' (ప్ర‌చారంలో ఉన్న పేరు). ఇందులో మ‌హేష్ ముఖ్య‌మంత్రిగా సంద‌డి చేయ‌నున్న సంగ‌తి తెలిసిందే. ద‌ర్శ‌కుడు కొరటాల.. తన గత సినిమాలన్నింటిలోనూ ఏదో ఒక సామాజిక అంశాన్ని టచ్ చేస్తూనే వచ్చారు.

గతంలో మ‌హేష్‌, కొర‌టాల కాంబోలో వచ్చిన 'శ్రీమంతుడు'లో కూడా ఊరిని దత్తత తీసుకోవడం అనే కాన్సెప్ట్ ని చెప్పారు. ఈ కార‌ణంగా.. ఈ సినిమా కోసం మ‌హేష్ అభిమానులు మ‌రింత‌ ఆసక్తిగా ఎదురుచూస్తున్నారు. అలాగే ఈ మధ్య కొరటాల తన ట్విట్టర్ అకౌంటులో ఎడ్యుకేషన్ సిస్టం గురించి ఒక ట్వీట్ చేసారు. ఆ ట్వీట్ ని నిజం చేస్తూ ఈ సినిమాలో కూడా ఎడ్యుకేషన్ సిస్టం పై తన దృష్టిని సారించినట్లు ఊహాగానాలు వస్తున్నాయి.

ఈ సినిమా హైదరాబాద్ షెడ్యూల్ నిన్నటితో పూర్తయింది. త్వరలో ఆఖ‌రి షెడ్యూల్ కోసం చిత్ర బృందం కారైకుడి (తమిళనాడు) వెళ్ల‌నుంది. అక్కడ డిసెంబర్ 25 వరకు ఆఖరి షెడ్యూలుని చిత్రీకరిస్తారు. తాజా సమాచారం ప్రకారం ఈ సినిమా టైటిల్‌, ఫస్ట్ లుక్ ను డిసెంబర్ 31 రాత్రి విడుదల చేయబోతున్నారని తెలిసింది. అయితే దీనిపై అధికారిక స‌మాచారం రాలేదు.

డి.వి.వి.దానయ్య నిర్మిస్తున్న ఈ చిత్రంలో కైరా అద్వాని హీరోయిన్ న‌టిస్తుండ‌గా.. దేవిశ్రీ ప్రసాద్ మ్యూజిక్ అందిస్తున్నారు. వేస‌వి కానుక‌గా ఏప్రిల్ 27, 2018న ఈ సినిమాని విడుదల చేయబోతున్నారు.