Mahesh Babu: థ్యాంక్యూ మై హోమ్‌టౌన్ గుంటూరు.. మహేష్ ఎమోషనల్ పోస్ట్..
- IndiaGlitz, [Wednesday,January 10 2024]
సూపర్ స్టార్ మహేష్ బాబు హీరోగా, త్రివిక్రమ్ దర్శకత్వంలో వస్తున్న 'గుంటూరు కారం' సినిమా మరో రెండు రోజుల్లో థియేటర్లలోకి రానుంది. దీంతో మూవీ యూనిట్ ప్రమోషన్స్‌లో జోరు పెంచింది. ఈ క్రమంలోనే మంగళవారం రాత్రి గుంటూరులో మూవీ ప్రీరిలీజ్ ఈవెంట్ నిర్వహించింది. ఈ వేడుకకు భారీ ఎత్తున అభిమానులు తరలివచ్చారు. ఈ సందర్భంగా మహేష్ మాట్లాడుతూ ప్రతి సంక్రాంతికి మా సినిమాలు బ్లాక్‌బాస్టర్ అయ్యాయి. ఈసారి కూడా గట్టిగా కొడుతున్నాం. అయితే ఈసారి నాన్న లేని లోటు మాత్రం ఉంది. ఇక నుంచి అభిమానులే నాకు అమ్మ, నాన్న.. ఏదైనా ఇక మీరే అని చెబుతూ తీవ్ర భావోద్వేగానికి అయ్యారు.
తాజాగా ఈ ఈవెంట్ సక్సెస్‌పై స్పందిస్తూ మహేష్, ఆయన భార్య నమ్రత శిరోద్కర్ అభిమానులకు ధన్యవాదాలు చెబుతూ సోషల్ మీడియాలో పోస్టులు పెట్టారు. థ్యాంక్యూ గుంటూరు. నా సొంత పట్టణంలో నా సినిమాని సెలబ్రేట్ చేసుకోవడం మీరు అందించిన ఈ ప్రేమ, ఈ జ్ఞాపకాలు నా హృదయాన్ని హత్తుకున్నాయి. లవ్ యూ ఆల్. నా సూపర్ ఫ్యాన్స్ అందర్నీ త్వరలో మళ్లీ కలుస్తాను. సంక్రాంతి మొదలైంది. ముఖ్యంగా గుంటూరు పోలీసులకు, వారు ఇచ్చిన మద్దతుకి ప్రత్యేక ధన్యవాదాలు అని పోస్ట్ చేశారు.
ఇక మహేష్ భార్య నమ్రత కూడా ఈ ఈవెంట్‌కి సంబంధిచిన ఓ వీడియోని షేర్ చేశారు. మహేష్ బాబు తన అభిమానుల పట్ల ఎంత ప్రేమగా ఉంటారో మాట్లాడటానికి నేనే చివరి వ్యక్తిని కావొచ్చు. ఎల్లప్పుడూ రెండు రాష్ట్రాల్లోని ప్రజలు, ప్రపంచవ్యాప్తంగా ఉన్న అభిమానులు మహేష్ పట్ల ప్రేమ చూపిస్తుంటారు. మహేష్ చేసే అన్ని ప్రయత్నాలలోనూ మీరు మద్దతుగా ఉండి అతడి సినిమాల కోసం ఇంకా కష్టపడేలా చేస్తారు.
కానీ గుంటూరులో మహేష్‌కి, అతని టీంకి మీరిచ్చిన ఆదరణ చూసిన తర్వాత గర్వంగా చెప్పగలను మహేష్ బాబు.. అభిమానులకు ఒక ఎమోషన్. ఈ అభిమానం, ప్రేమ మీ కుటుంబ సభ్యులుగా మాకు ఎల్లప్పుడూ ఉండాలి. మేము మా ప్రేమని మీకు అన్ని మార్గాల్లోనూ అందిస్తాము. మీరు కూడా మా ప్రేమని స్వీకరిస్తారు అని భావిస్తున్నాను. మహేష్‌ని ఇంతగా ప్రేమించే మీ అందరికి ప్రత్యేకంగా ధన్యవాదాలు తెలుపుతున్నాను అంటూ పోస్ట్ చేశారు. ప్రస్తుతం మహేష్, నమ్రత సోషల్ మీడియా పోస్టులు సోషల్ మీడియాలో వైరల్‌గా మారాయి. కాగా సంక్రాంతి కానుకగా ఈనెల 12 'గుంటూరు కారం' సినిమా థియేటర్లలోకి విడుదల కానుంది.