మ‌హేశ్ డబుల్ ధ‌మాకా?
- IndiaGlitz, [Saturday,July 18 2020]
సూప‌ర్‌స్టార్ మ‌హేశ్ 27వ చిత్రం స‌ర్కారువారి పాట. ఈ ఏడాది సంక్రాంతికి స‌రిలేరు నీకెవ్వ‌రుతో మ‌హేశ్ సూప‌ర్‌హిట్ సాధించిన సంగతి తెలిసిందే. దాని త‌ర్వాత ప్రారంభ‌మైన స‌ర్కారు వారి పాట రెగ్యుల‌ర్ షూటింగ్‌కు విల‌న్‌గా కరోనా అడ్డు ప‌డింది. ప‌రిస్థితులు స‌ద్దుమ‌ణిగిన త‌ర్వాత ఈ సినిమాను సెట్స్‌పైకి తీసుకెళ్లాల‌ని నిర్మాతలు ప్లాన్ చేస్తున్నారు. ఈ సినిమాలో హీరో బ్యాంకుల‌ను మోసం చేసి పారిపోయిన విల‌న్‌ను తిరిగి ఇండియాకు ర‌ప్పించి డ‌బ్బులు వ‌సూలు చేయిస్తాడ‌ని వార్త‌లు వినిపించాయి. ఇప్పుడు తాజా సోష‌ల్ మీడియా వ‌ర్గాల అప్‌డేట్ ప్ర‌కారం మ‌హేశ్ ఈ చిత్రంలో ద్విపాత్రాభిన‌యం చేస్తున్నార‌ట.
ఇదే క‌నుక నిజ‌మైతే ఇన్నేళ్ల కెరీర్‌లో మ‌హేశ్ ద్విపాత్రాభిన‌యం చేసే తొలి చిత్ర‌మిదే అవుతుంది. రెండింటిలో ఓ పాత్ర కాస్త నెగటివ్ ట‌చ్ ఉన్నట్లు సాగుతుంద‌ని వార్త‌లు చ‌క్క‌ర్లు కొడుతున్నాయి. మ‌రి ఈ వార్త‌ల‌పై మ‌హేశ్ అండ్ టీమ్ ఎలా రియాక్ట్ అవుతుందో చూడాలి. ప‌రుశురామ్ ద‌ర్శ‌క‌త్వం వ‌హిస్తోన్న ఈ చిత్రంలో కీర్తి సురేశ్ హీరోయిన్‌గా న‌టిస్తుంది. మైత్రీ మూవీ మేక‌ర్స్‌, 14 రీల్ ప్ల‌స్‌, జీఎంబీ ఎంట‌ర్‌టైన్‌మెంట్ బ్యాన‌ర్స్‌పై సినిమా రూపొందనుంది.